Código Cero - Diario Tecnolóxico de Galicia

ChatGPT quere converterse nun asesor financeiro persoal

Redacción — 2026-05-15T19:30:00Z

OpenAI anunciou unha nova experiencia de finanzas persoais integrada en ChatGPT, dispoñible inicialmente en fase de proba para usuarios Pro nos EE.UU. A funcionalidade permite conectar contas financeiras directamente co asistente mediante integracións seguras con máis de 12.000 entidades bancarias, ofrecendo unha visión consolidada dos gastos, investimentos, pagamentos e subscricións do usuario.
A proposta busca transformar ChatGPT nun asistente financeiro contextual capaz de responder preguntas baseadas non só en información xenérica, senón tamén na situación económica real de cada persoa. A plataforma pode analizar patróns de gasto, axudar a definir obxectivos de aforro, estudar riscos de investimento ou preparar escenarios económicos personalizados.
A conexión das contas realízase a través de Plaid, mentres que tamén está previsto incorporar soporte para Intuit. Unha vez autenticadas as credenciais, ChatGPT sincroniza os datos financeiros e organiza automaticamente a información por categorías. O sistema funciona tanto na versión web como na aplicación para iPhone.
A nova sección Finances, accesible desde a barra lateral de ChatGPT, mostra un panel cun resumo actualizado da situación económica do usuario, incluíndo rendemento de investimentos, gastos recorrentes, pagamentos pendentes ou subscricións activas. Ademais, o usuario pode proporcionar información adicional como hipotecas, préstamos familiares ou obxectivos de compra, datos que se almacenan como memorias financeiras para mellorar futuras conversacións.
OpenAI exemplifica o funcionamento do sistema comparando respostas xenéricas con respostas contextualizadas. Sen acceso ás contas, ChatGPT pode ofrecer recomendacións habituais sobre reducir gastos ou automatizar aforros. Coas contas conectadas, o asistente pode identificar categorías concretas onde se concentra o gasto, establecer límites mensuais realistas ou calcular o potencial de aforro a partir dos hábitos reais do usuario.
A experiencia financeira funciona de xeito predeterminado con GPT-5.5 Thinking, o modelo máis recente da compañía orientado ao razoamento avanzado. OpenAI asegura que o sistema foi avaliado en colaboración con máis de 50 profesionais do ámbito financeiro para medir a súa precisión en tarefas complexas relacionadas coas finanzas persoais.
Salientan que ChatGPT non substitúe o asesoramento financeiro profesional. O asistente pode analizar información e suxerir opcións, pero non executa operacións bancarias nin ten acceso aos números completos das contas.
Prevén ampliar progresivamente a dispoñibilidade desta funcionalidade a usuarios Plus e posteriormente ao resto de usuarios da plataforma. OpenAI tamén anticipa unha integración máis profunda con socios como Intuit para facilitar accións financeiras directamente desde ChatGPT, como solicitar tarxetas de crédito, obter estimacións fiscais ou contactar con asesores especializados sen abandonar a conversa.

Moss salta da VR a PC e consolas

Redacción — 2026-05-15T19:00:00Z

O estudio Polyarc anunciou Moss: The Forgotten Relic, unha versión revisada e ampliada da coñecida saga protagonizada pola pequena ratoa Quill, que chegará a PC (Steam), Nintendo Switch, Nintendo Switch 2, PlayStation 5, Xbox Series X|S e Xbox One no verán. O título recompila nunha única experiencia Moss, Moss: Book II e o contido descargable Twilight Garden, adaptando por primeira vez a franquía ao xogo en pantalla tradicional tras o seu percorrido en realidade virtual.
A proposta sitúa os xogadores nun mundo inspirado nos contos fantásticos clásicos, cun reino en ruínas que a natureza vai recuperando lentamente. A historia segue a Quill, unha ratoa moza que descobre unha antiga reliquia de cristal verde e establece unha conexión cun espírito misterioso, representado polo propio xogador. Xuntos deberán afrontar as forzas arcanas coñecidas como Arcane, responsables dunha ameaza que podería alterar o destino do mundo.
O xogo combina exploración, resolución de quebracabezas ambientais e combates nunha aventura construída arredor da relación entre Quill e o xogador. Os escenarios están deseñados como pequenos dioramas interactivos, cheos de segredos e rutas ocultas, mentres que a narrativa aposta por un ton emocional centrado na superación, a perda e a valentía.
As novidades desta edición inclúen melloras gráficas e de rendemento, novas secuencias cinemáticas creadas especificamente para esta versión e unha cámara intelixente que segue automaticamente a protagonista. Tamén se incorpora unha opción de accesibilidade chamada Saltar combate, pensada para facilitar a experiencia a quen prefira centrarse na exploración e na historia.
A banda sonora orquestral volve contar co compositor Jason Graves, coñecido polo seu traballo en series como Dead Space ou Tomb Raider. A franquía acumula máis de 160 premios e nomeamentos desde o lanzamento do primeiro Moss en realidade virtual.

Tráiler de presentación de Moss: The Forgotten Relic/small>

130 millóns de euros para reforzar as tecnoloxías cuánticas e a IA

Redacción — 2026-05-15T19:00:00Z

A Xunta reforza con 130 millóns de euros a súa aposta polas tecnoloxías profundas, como a computación cuántica e a intelixencia artificial, co obxectivo de impulsar a I+D+i en Galicia. O ecosistema galego vén demostrando nos últimos anos que dispón da capacidade científica, o tecido empresarial e o talento precisos para situarse na vangarda das deep tech en consonancia coas directrices europeas. Así o salientou hoxe a directora da Axencia Galega de Innovación, Carmen Cotelo, durante a súa comparecencia na Comisión 4ª do Parlamento de Galicia para explicar os avances acadados a través do Plan galego de investigación e innovación 2025-2027.
Dos 130 millóns de euros destinados a fortalecer capacidades estratéxicas de futuro en Galicia, 35,4 millóns corresponden a convocatorias xa resoltas vinculadas a proxectos de intelixencia artificial e tecnoloxías cuánticas, entre elas Nexos, VInnovate, Unidades Mixtas, programas predoutorais, postdoutorais, doutorados industriais e Ignicia. Outros 12,7 millóns de euros reservaranse para novas convocatorias que o Executivo galego publicará proximamente nestes ámbitos. Súmase tamén a adxudicación a Galicia da Factoría Europea de IA, que mobilizará 82 millóns de euros.
Estas actuacións evidencian a adaptación do ecosistema galego de I+D+i ás tecnoloxías avanzadas. Segundo indicou a representante da Consellería de Educación, Ciencia, Universidades e Formación Profesional, «a intelixencia artificial e a cuántica son tecnoloxías con capacidade para transformar sectores como a saúde, a enerxía, a biotecnoloxía, a industria agroalimentaria, a loxística ou os servizos públicos, ademais de crear emprego cualificado e abrir novas oportunidades económicas».
Galicia conseguiu consolidar unha posición destacada na integración da intelixencia artificial. Ademais da factoría europea de IA OneHealth, unha das 19 aprobadas pola Comisión Europea, a folla de ruta galega inclúe proxectos como o novo centro de datos do CESGA, chamado a reforzar as capacidades de computación avanzada.
O CESGA ocupa un papel central nesta estratexia. No ámbito cuántico xa conta co computador Qmio de 32 cúbits, o primeiro instalado nunha institución pública española e tamén o máis potente do sur de Europa. «Imos seguir avanzando coa incorporación dun novo computador cuántico de 54 cúbits, cun investimento de 9 millóns de euros», destacou Carmen Cotelo, quen tamén puxo en valor o labor do Vigo Quantum Communication Centre (VQCC) da Universidade de Vigo e do CITIC da Universidade da Coruña, implicados no desenvolvemento dunha infraestrutura cuántica pioneira ao servizo da investigación.
Avanza tamén a construción dos laboratorios CESGA-AtlanTTic e IGFAE-CESGA Quantum Computing Lab, dotados con capacidades experimentais únicas en España e cun investimento de 4,6 millóns de euros procedentes de fondos europeos e recursos propios. Ademais, xa entrou en funcionamento a autopista de comunicacións cuánticas máis longa de España, con 120 quilómetros entre Santiago e Vigo, que se ampliará ata Valença. Tamén está operativa a estación óptica terrestre da Universidade de Vigo para comunicacións espaciais, considerada a maior de España. Galicia asumirá igualmente a coordinación dun val europeo de innovación especializado en tecnoloxías cuánticas.
Entre as próximas convocatorias anunciadas figura Vinnovate Galicia, un instrumento de cooperación entre empresas e entidades de distintas rexións europeas ao que se destinará un millón de euros para proxectos relacionados coas tecnoloxías profundas e a biotecnoloxía. Tamén se reforzará o programa de Recuperación Excelencia NEOTEC, orientado a empresas innovadoras de base tecnolóxica que quedaron sen financiamento estatal. «Destinaremos un 30 % do orzamento a este tipo de proxectos dentro dunha convocatoria global de 2,73 millóns de euros para rescatar iniciativas galegas que non puideron ser financiadas», explicou a directora da Axencia Galega de Innovación.
O novo programa Ciencia-Empresa, pensado para proxectos individuais de I+D empresarial con capacidade de transferencia e impacto económico, activou unha convocatoria de 3 millóns de euros, dos que 2,4 millóns se reservan para este ámbito. «A convocatoria acaba de pechar o prazo cunha resposta moi positiva: o 92 % dos proxectos presentados céntranse en tecnoloxías avanzadas», afirmou Cotelo.
A Xunta ultima tamén a tramitación doutras dúas novas liñas de apoio: unha convocatoria Deep Tech para proxectos colaborativos en intelixencia artificial e computación cuántica, e outra destinada a proxectos colaborativos de I+D+i en biotecnoloxía. «Son instrumentos, financiamento e capacidades para que Galicia participe activamente no desenvolvemento destas tecnoloxías e nos grandes espazos europeos de innovación», concluíu Carmen Cotelo.

A 21ª edición de Galiciencia entrega os seus galardóns

S. P. — 2026-05-15T19:00:00Z

A 21ª edición da feira científico-tecnolóxica Galiciencia, organizada pola Tecnópole co foco posto na ciberseguridade, clausurouse na mañá deste venres 15 de maio coa entrega de premios. Participou no acto a directora de Innovación do IGAPE, Rosa Méndez; a alcaldesa de San Cibrao das Viñas e vicepresidenta da Deputación de Ourense, Marta Novoa; xunto ao director xerente de Tecnópole, Javier Taibo. O primeiro premio foi para unha escuma de orixe natural para protexer a vexetación fronte aos incendios forestais. O segundo para o equipo que desenvolveu un herbicida ecolóxico para a agricultura a partir de extractos obtidos de eucalipto e piñeiro. Os terceiros deseñaron unha aplicación destinada a fomentar hábitos sostíbeis na poboación para reducir o impacto ambiental.
O primeiro premio
Daniela García e Eila Lago, alumnas do Colexio Salesiano María Auxiliadora de Vigo, recibiron o primeiro premio desta edición. Presentaron unha espuma ignífuga vexetal biodegradábel para protexer a vexetación fronte aos incendios forestais. Está elaborada con plantas como o aloe vera e outras substancias naturais capaces de xerar e estabilizar a espuma, que, segundo os seus resultados, pode manterse adherida á vexetación durante varias horas.
O proxecto foi rexistrado para protexer a súa autoría e podería dar lugar no futuro ao desenvolvemento dunha patente. O premio, dotado con 1.000 euros, serviralles para financiar a súa participación na maior feira científica a nivel estatal, Exporecerca, que se celebra anualmente en Barcelona.
O segundo premio
O segundo equipo clasificado foi o formado por Héctor Abal e Andrés Fentanes, do IES Ponte Caldelas, que desenvolveron un herbicida natural. “Buscabamos unha alternativa máis ecolóxica aos herbicidas químicos como o glifosato, polo que estudamos a alelopatía, un fenómeno polo que certas plantas liberan compostos capaces de inhibir o crecemento doutras especies, o que resulta de interese para a procura de alternativas naturais para o control de malezas na agricultura” -sinalan-.
. Así, avaliaron o potencial inhibitorio de extractos de varias especies e chegaron á conclusión de que “o piñeiro e o eucalipto evitan que medre a maleza, cunha eficiencia que se pode comparar á dos herbicidas comerciais, pero con menor toxicidade para o medio ambiente”. Este segundo premio, de 500 €, permitiralles participar na Zientzia Azoka, a feira de ciencia que se celebra en Bilbao.
Terceiro premio
O terceiro premio foi para o proxecto de Iker Solveira e Candela Blanco, do Colexio Miraflores do Pereiro de Aguiar, por unha aplicación que fomenta hábitos sostíbeis entre a poboación co fin de reducir o impacto ambiental. Segundo os creadores, esta ferramenta motiva ás persoas a reciclar, usar transportes respectuosos co medio mediante unha serie de retos e recompensas.
“Se as persoas reciben unha información clara sobre o impacto das súas accións e teñen unha gratificación, hai máis probabilidade de que adopten rutinas ecolóxicas no seu día a día” -aseguran os rapaces-.
Máis innovador: un sistema de alerta e vixilancia intravenosa
O proxecto máis innovador foi o de Camila Fernández e Rodrigo Riveiro, de Aulas Tecnópole de San Cibrao das Viñas. Crearon SAVI, un Sistema de Alerta e Vixilancia Intravenosa.
Trátase dun brazalete que protexe e controla as vías intravenosas, detecta movementos de risco e avisa en tempo real se se interrompe o fluxo. Os seus creadores sinalan que é cómodo e non invasivo.
Proxecto feminino: da ciencia ao cine
O premio para o mellor proxecto liderado por unha nena foi o de Vega Vidal e Kirstten Cabrera, do IES Ponte Caldelas. Crearon un blog científico que usa escenas de películas e experimentos simples para explicar a física e espertar o interese por esta ciencia. Analizaron escenas coñecidas polo gran público para comprobar se o que ocorre nelas respecta as leis da física.
“O proxecto demostra que a física non é só un conxunto de fórmulas, senón unha ferramenta para analizar e comprender a realidade. Ademais, fomenta o pensamento crítico fronte á desinformación e amosa como o método científico axuda a diferenciar entre a realidade e a ficción” -destacaron-.
Método científico: unha boia que controla a calidade da auga en acuicultura
O proxecto co método científico e proceso de investigación mellor definido foi o de Nair González e Leire González, do campamento T2W de Tecnópole (San Cibrao das Viñas).
Desenvolveron unha boia para controlar a calidade da auga na acuicultura. Para iso emprega sensores e mexillóns como bioindicadores para detectar a contaminación de forma temperá.
Mellor comunicación: xogamos realmente seguros?
Martina Collazo, do Colexio Apóstolo Santiago de Vigo, realizou un estudo sobre o phishing en videoxogos e a vulnerabilidade da rapazada ante mensaxes enganosas en chats de xogos.
Ante a realidade de que moitos menores xogan en liña e están expostos a enganos, comprobaron que os nenos e nenas non son capaces de detectar as fraudes, sobre todo nos casos nos que a mensaxe lles ofrece recompensas ou parece amigábel. Ante estes resultados, manifestan que “cómpre reforzar a educación en ciberseguridade”.
Mellor proxecto sobre ciberseguridade: unha aplicación que protexe os arquivos fronte a ciberataques
O mellor proxecto vencellado coa ciberseguridade foi o de Nicolás García e Xián Couto, do IES Castelao de Vigo. Crearon unha ferramenta de cifrado de arquivos para protexer a información ante ciberataques. Salientan que se trata dunha aplicación “moi robusta, accesíbel para todo o mundo e en todas partes. Non se precisa que o usuario teña coñecementos técnicos para garantir a súa seguridade”.
Aseguran que é moi doada de manexar e grande utilidade para cifrar calquera tipo de arquivo.
Máis popular: unha caixa intelixente para protexer os restos arqueolóxicos
O premio do público foi para Elián Martínez e Pablo Pita, do IES de Ortigueira. Deseñaron e construíron unha caixa intelixente para transportar, en condicións óptimas de temperatura e humidade, os restos que aparecen nos xacementos arqueolóxicos, co fin de facilitar e protexer o traballo dos arqueólogos.
“O noso sistema permite controlar en todo momento estas dúas magnitudes. Ademais, posibilita obter as coordenadas da caixa para proceder ao seu almacenamento en museos” -apuntan-.
Premio especial para un alumno de Barcelona que demostra que a sensibilidade poética non depende da formación académica
O xurado desta edición decidiu outorgar un premio especial a Darío de las Heras, do Institut Vilanova del Vallès (Barcelona). Estudou a obra poética de Tomás de las Heras, o seu avó, “un poeta analfabeto”, para demostrar que a sensibilidade artística permite xerar estruturas literarias complexas sen formación académica previa.
O premiado quixo desafiar a idea de que a calidade poética depende exclusivamente da formación. Así, quere deixar patente que “unha persoa analfabeta pode empregar recursos literarios complexos de maneira intuitiva, como resultado da súa sensibilidade artística, a súa contorna cultural e a súa experiencia vital”.

A Rede galega ferve de actividades arredor de Begoña Caamaño

S. P. — 2026-05-15T18:30:00Z

Quen navegue estes días pola Rede galega vai descubrir centos de recursos informativos e conmemorativos arredor da escritora viguesa Begoña Caamaño, homenaxeada nesta edición do Día das Letras Galegas que celebramos este domingo 17 de maio. Damos conta dalgúns dos recursos máis destacados.

Documental conmemorativo da RAG (e outros contidos)

A Real Academia Galega puxo na Rede o audiovisual Begoña Caamaño Caamaño: navegar no pracer do azul, unha obra conmemorativa producida co gallo das Letras Galegas 2026, realizada por Miramemira con Damián Varela Pastrana e Alba López Álvarez na dirección e o guión. Pode verse xa en academia.gal e na canle de YouTube da RAG.
A película propón un percorrido pola vida e o legado da autora á que a institución lle dedica o vindeiro 17 de maio a través dos testemuños de persoas que a acompañaron nas súas diversas facianas persoais e profesionais. Destaca ademais como parte do relato a interpretación artística da súa obra literaria, que ten na colaboración da Escola Superior de Arte Dramática de Galicia un dos esteos.
Segundo avanza a RAG, o documental conecta as dúas cidades en que Begoña Caamaño (1964-2014) viviu reconstruíndo a traxectoria desde a nenez e a mocidade ata á consolidación como xornalista e escritora. Desde o Vigo natal, onde medrou nos barrios do Calvario e Coia e se converteu en xornalista, ata Santiago de Compostela, onde continuou a súa carreira e vida a partir de 1989, cando se incorporou á redacción central da Radio Galega. Nesta cidade escribiría as súas dúas novelas, Circe ou o pracer do azul (2009) e Morgana en Esmelle (2012), froito dun debut tardío pero maduro e anovador da escena das letras galegas do momento que segue a ter plena vixencia e interese.
A película documental dálle tamén voz á mocidade en relación cos grandes temas da obra literaria de Caamaño, o seu exercicio como xornalista comprometida coa honestidade e a defensa da lingua galega e mais o seu activismo.
A película contou con múltiples colaboracións. No apartado de material de documentación, alén de imaxes e audios da CSAG, a narración apóiase en fotografías de Mulheres Transgredindo, Mulheres Nacionalistas Galegas, Sonia Díaz, Ra&Ka e os arquivos persoais de Ana Romaní, Maika Aguado e a propia Begoña Caamaño.
Begoña Caamaño: navegar no pracer do azul realizouse co apoio económico da Deputación da Coruña, a Xunta de Galicia e o Ministerio de Ciencia, Innovación e Universidades.
Ademais disto, a RAG estreou a súa serie de reels sobre a escritora homenaxeada este ano nas Letras. Baixo o cancelo #éotempodeBegoñaCaamaño, ofrece petiscos sobre a vida e a obra da autora nunha produción dirixida especialmente ao público máis novo que conta coa colaboración de diversas creadoras e creadores de contidos nas redes sociais.
Os minivídeos estanse a publicar nas contas da Real Academia Galega en Instagram, Facebook e Bluesky (@reacademiagalega), X @academiagalega) e YouTube (@RealAcademiaGalega), e tamén en TikTok.
Arredor de Begoña Caamaño xira tamén o primeiro videopodcast da RAG, que vén cunha entrevista ás Fillas de Cassandra. Coma a escritora no mundo literario, María SOA e Sara Faro propoñen no seu traballo musical unha reescritura dos mitos desde unha ollada feminista. O seguinte episodio é unha conversa coa escritora Antía Yáñez, que debutou con Senlleiras (2018), unha novela sobre mulleres que rachan co silencio.

O alumnado do CIFP Leixa lanzou BegoZine

O alumnado do CIFP Leixa de Ferrol vén de publicar un pequeno sitio web con recursos interactivos arredor da vida e obra de Begoña Caamaño, a autora homenaxeada no Día das Letras Galegas deste 2026. O recurso, que se pode visitar dende hai uns días na web do CIPF Leixa, foi elaborado integramente por estudantes do ciclo formativo.
O BegoZine inspírase nos fanzines impresos, mais dálle unha volta levando o concepto ao mundo dixital e facelo interactivo. Cada estudante deseñou, a título individual ou en grupo, algunha pequena experiencia virtual arredor do mundo de Begoña Caamaño e plasmouna dentro desta escolma web.
Este proxecto foi realizado polo alumnado de 2º curso do Ciclo Superior de Deseño e edición de publicacións impresas e multimedia, que non só tivo que investigar sobre a figura de Begoña Caamaño, senón que tamén se enfrontou á complexidade de artellar e coordinar un proxecto multimedia realizado por máis dunha ducia de persoas.

O Colexio de Xornalistas reivindica a faceta xornalística da homenaxeada

O Colexio Profesional de Xornalistas de Galicia reivindicou a figura de Begoña Caamaño como xornalista cun podcast dirixido por Lucía Junquera, que estreou o 9 de abril o primeiro episodio e ao que se sumou encontro periodístico celebrado o sábado 25 de abril na Casa das Máquinas de Santiago. Estes actos, agrupados baixo a denominación Poñer a voz, foron realizados coa subvención da Secretaría Xeral da Lingua da Xunta de Galicia.
Respecto do programa-podcast celebrado o pasado 25 de abril, que arrincou da man da irmá de Begoña, Beatriz Caamaño, foi un encontro festivo cuxa gravación agora serve de epílogo ás cinco entregas de Poñer a Voz, coas voces de xornalistas de varias xeracións e coa lectura de textos de Caamaño da man das súas compañeiras da radio.
Conducido por Mónica Rosas, no encontro contou coas intervencións de Lucía Junquera, Ana Romaní, Sonia Díaz, María Xosé Porteiro, Pablo Lago e Marga Tojo; ademais da lectura de textos de Begoña Caamaño nas voces de Bea Caamaño, Eva Sandino, Concha de la Fuente, Anxo Quintela e Concha Cid Fuentes. Ao longo de dúas horas as participantes debullan o pasado, analizan o presente e albiscan o futuro do xornalismo a partir da traxectoria de Caamaño, do seu rigor profesional, o seu compromiso e a súa alegría. O peche musical vén da man de Uxía, con dous temas escritos para ela.
O podcast Poñer a voz é un relato sonoro en cinco capítulos que atravesa a vida de Begoña Caamaño. Desde a súa infancia e xuventude en Vigo, onde prende a paixón por contar historias, ata a súa implicación vital no feminismo, no coidado da lingua, no antimilitarismo e na defensa dos medios públicos. Como nexo: o xornalismo. A radio como medio fundamental, pero tamén os artigos que escribiu na prensa e revistas especializadas. Unha lingua e unha linguaxe propia, diferente á literaria, pero que tamén conforma as nosas Letras Galegas.
Poñer a voz pode escoitarse a través de Ivoox, Spotify e Apple Podcast, ademais de na web de Xornalistas. Ademais da voz conservada pola radio da propia Begoña Caamaño, e da dirección e condución de Lucía Junquera, o podcast conta coa participación de Bea Caamaño, Ana Romaní, Xosé María Palmeiro, Concha Cid Fuentes, María Xosé Porteiro, Fani del Río, Víctor Freixanes, Tiago Alvite, Raquel Lema, Carme Hermida, Silvia López, Uxía Iglesias e Belén Teiga.

A web do CCG, ferramenta de cabeceira

A web do Consello da Cultura Galega volve ser un ano máis un dos principais recursos dos que botar man para celebrarmos na Rede a festa do 17.
Entre as actividades máis destacadas destes días figura a edición facsimilar de Libro das amigas, que inclúe 24 contribucións de diferente tipo que a contorna máis próxima da autora de Morgana en Esmelle lle dedicou no primeiro cabodano. O libro das amigas tamén ten edición dixital e xa se pode descargar desde a web do CCG.
Amais, o Consello informou dunha completa entrada sobre a figura de Begoña Caamaño na súa enciclopedia en liña de personalidades galegas. Amanda Álvarez González é a autora da entrada no Álbum de Galicia na que a cualifica como “unha voz imprescindíbel no feminismo galego”. A entrada do Álbum de Galicia salienta a súa faceta como xornalista e activista sindical e política, e tamén do seu labor en numerosas asociacións feministas e sindicais. Saliéntase por suposto a súa creación literaria: compuxo letras para a cantante Uxía e María Fumaça e publicou dúas novelas: Circe ou o pracer do azul (2009) e Morgana en Esmelle (2012).

O Concerto das Letras Galegas

Ademais do devandito, o Consello da Cultura Galega organiza este sábado a 16ª edición do Concerto das Letras Galegas. Celebrarase este ano en Vigo, lugar de nacemento, formación e primeiros pasos profesionais de Begoña Caamaño.
O concerto, de entrada libre e gratuíta, terá lugar no Auditorio Mar de Vigo o 16 de maio (20:30 horas) e poderá seguirse en directo a través da web do CCG (consellodacultura.gal) e na Televisión de Galicia (crtvg.gal), no marco da programación do Día das Letras Galegas.
Trátase dun concerto composto por 14 pezas que transitan do íntimo ao festivo, no que a artista galega Uxía Senlle renderá homenaxe á memoria dunha das súas grandes amigas. Ao mesmo tempo, a proposta percorre tanto os gustos musicais de Begoña como aquelas composicións que acompañaron a súa traxectoria profesional.
Ao longo de 75 minutos desfilarán polo Auditorio Mar de Vigo figuras e símbolos como Circe, Morgana, as amigas, o mar de Arousa e a ría de Vigo, Penélope, a casa da Comboa, as humildes, as pegadas do seu andar pola terra, as rebeldes, as mans enlazadas e as lobas que ouvean, referencias clave no legado e na obra de Begoña Caamaño.
Polo que respecta á imaxe gráfica do Concerto das Letras Galegas, foi deseñada por Leandro Lamas. Este formato constitúe un proxecto musical de Uxía Senlle, unha das voces máis recoñecidas da música galega contemporánea. No concerto estará acompañada pola súa banda, integrada por Santi Cribeiro no acordeón, Rafa Otero na guitarra acústica e eléctrica, Yudit Almeida no contrabaixo e Isaac Palacín na percusión.
O concerto será de entrada libre e gratuíta ata completar a capacidade do auditorio (1.425 butacas) e poderá seguirse tamén en directo a través da web do Consello da Cultura Galega.
Así mesmo, o día 17 de maio emitirase no marco da programación especial que a Televisión de Galicia elaborou para o Día das Letras Galegas, en horario de máxima audiencia na segunda canle, a G2.

En Lingua.gal

A web da Secretaría Xeral da Lingua, o Portal da Lingua, preséntase tamén como unha fonte de información e de celebración moi relevante.
Ademais, a Secretaría impulsou actividades conmemorativas con Feiraco, con Gadis e con Renfe, entre outras, a través de cuxas colaboracións búscase celebrar o 17 de maio dunha maneira próxima e creativa.
O Portal da Lingua ofrece esta tempada (entre outros contidos) unha biografía da autora homenaxeada este ano no Día das Letras Galegas, na que se destaca o seu moi destacado talento literario, a súa firme e temperá vocación xornalística e, tamén, o seu enraizado compromiso co feminismo, coa igualdade e coas liberdades (participa nos foros da Marcha Mundial das Mulleres, é unha das impulsoras da asociación Mulleres Galegas na Comunicación e forma parte de Mulheres Nacionalistas Galegas). Destácase tamén a fonda pegada deixada polas súas novelas, Circe ou o pracer do azul (2009), unha obra que reinterpreta a Odisea dende unha perspectiva feminista, e Morgana en Esmelle (2012), Premio da Crítica Española ao Mellor Libro de Narrativa en 2021, na que analiza e reivindica a cuestión da sororidade ou o irmandamento feminino e solidario (entre mulleres), antes incluso de que o termo fora aceptado pola RAG ou a RAE.
Estaría preparando unha terceira novela cando a Parca cortou o fío que a unía á vida. Isto acontecía en outubro de 2015.
“As obras de Begoña Caamaño convídannos a reflexionar sobre a condición humana, a abandonar o odio e o rancor e a abrazar unha sociedade máis xusta e igualitaria”, saliéntase no Portal da Lingua.

Medio Rural reforza a promoción do leite galego con accións inmersivas nos centros comerciais

S. P. — 2026-05-15T18:00:00Z

A Consellería de Medio Rural está a reforzar con novas ferramentas de realidade virtual a promoción do leite galego certificado baixo o selo Galega 100 % mediante unha acción específica dirixida ao consumidor final que se está a desenvolver ao longo deste mes de maio en diferentes centros comerciais da nosa comunidade.
A esta actuación, que se enmarca na campaña de publicidade institucional do selo, achegouse a conselleira do Medio Rural, María José Gómez, ao posto situado no centro comercial As Cancelas, en Santiago de Compostela. Estivo acompañada polos directores xerais de Gandaría, Agricultura e Industrias Agroalimentarias, José Balseiros; e da PAC e do Control da Cadea Alimentaria, Juan José Cerviño.
Esta iniciativa contempla unha produción audiovisual, que se pode ver a través de lentes 3D e que permite unha inmersión virtual no rural galego. Cómpre lembrar que o slogan principal da campaña do selo Galega 100 % é Pásate ao modo CEN, vinculando “ese estado de tranquilidade e pracer co consumo de leite certificado e con garantía dun estándar de calidade superior”, informaron.
Así, na campaña búscase “destacar o leite galego como un produto de proximidade e máxima calidade, garantida baixo este selo”. Tamén se pretende “incrementar o consumo do leite galego entre a cidadanía”, así como “sensibilizar ao consumidor sobre a importancia do sector agrogandeiro e do gandeiro en particular, como peza fundamental no coidado do territorio, gardián da calidade do produto e xerador de riqueza para Galicia”.
Co obxectivo de “afianzar estes obxectivos e buscar un impacto máis directo no potencial consumidor”, neste 2026 púxose en marcha esta acción específica de difusión do selo Galega 100% en centros comerciais, que acompaña á campaña xeral. O calendario das actuacións iniciouse o 8 de maio no centro comercial Marineda da Coruña; logo tivo lugar no Odeón, de Ferrol, o día 9; e este 15 de maio en Santiago de Compostela. Continuarase mañá no centro comercial Pontevella de Ourense e o día 22 no das Termas de Lugo. A acción pecharase en Vigo, os días 23 (en Vialia) e 29 (en Gran Vía). Todas as actuacións desenvólvense en horario de 17:00 a 21:00 horas.

A nova aplicación Deportes Concello de Ames xa está en Android e iOS

S. P. — 2026-05-15T17:25:05Z

O Concello de Ames anunciou que xa está dispoñíbel para sistemas Android e iOS a aplicación Deportes Concello de Ames, un novo aplicativo para a inscrición nas actividades deportivas, a reserva dos distintos espazos deportivos e a tramitación dos distintos tipos de carné de acceso para as piscinas descubertas municipais.
Logo de desenvolver o aplicativo Cronos, o Concello de Ames dá un paso máis na dixitalización dos servizos deportivos coa aplicación Deportes Concello de Ames. En concreto, “esta plataforma permite aos usuarios e usuarias inscribirse nas actividades deportivas das Escolas deportivas municipais, facer a reserva dos distintos espazos deportivos, e tramitar os distintos tipos de carné de acceso para as piscinas descubertas municipais, e todo de xeito doado dende un dispositivo electrónico portátil”, informou o Concello.
Dende o Consistorio apuntan que “accións como a xestión da porta de acceso aos recintos deportivos ou mesmo a activación das luces, poderán facerse facilmente dende esta nova aplicación, a cal tamén permite facer reservas de instalacións para outras persoas ou autorizar a outros usuarios e usuarias para que realicen reservas das pistas deportivas no noso nome”.
A Concelleira de Deportes, Susana Señorís, sinalou que “dende o departamento de Deportes demos un paso máis para mellorar os servizos dixitais que ofrecemos á veciñanza amesá cunha nova plataforma de xestión de actividades e instalacións deportivas que se denomina Deportes Concello de Ames”.
Señorís destaca que dita aplicación “xa se pode descargar en dispositivos móbiles a través da App Store e no Google Play. Ademais pódese acceder a través de calquera navegador a través da versión web. Esta aplicación permite realizar a inscrición nas actividades que forman parte da programación deportiva municipal, para a reserva dos distintos espazos deportivos (pistas de tenis e pádel), así como tramitar os distintos tipos de carné de acceso para as piscinas descubertas municipais”.

Catorce investigadoras do CITIC, entre as máis destacadas no ranking do CSIC

S. P. — 2026-05-15T11:40:00Z

O Centro de Investigación en Tecnoloxías da Información e as Comunicacións da Universidade da Coruña (CITIC) conta con 14 investigadoras incluídas no Ranking de Mujeres Investigadoras Españolas y en España, elaborado polo Laboratorio de Cibermetría do Instituto de Políticas e Bens Públicos do Consejo Superior de Investigaciones Científicas (CSIC).
A clasificación reúne máis de 12.000 perfís de Google Scholar e doutras plataformas como ORCID e OpenAlex, e baséase en diversos indicadores de impacto científico. O obxectivo é dar visibilidade ao labor das mulleres investigadoras a través de datos abertos e accesibles, en liña cos principios da Ciencia Aberta (Open Science).
Entre as investigadoras do CITIC destacan perfís cunha elevada proxección científica internacional. No ranking aparecen, entre outras, Paula Fraga Lamas, Amparo Alonso Betanzos e Verónica Bolón Canedo, referentes no ámbito da intelixencia artificial e a ciencia de datos.Tamén figuran investigadoras como Nieves Rodríguez Brisaboa no ámbito das bases de datos; Margarita Alonso Ramos , en lingüística e tecnoloxías da linguaxe; Berta Guijarro Berdiñas, Noelia Sánchez Maroño, en intelixencia artificial; Lara Pallas Quintela; Susana Ladra González, en ciencia de datos; Noelia Barreira Rodríguez, en IA; Elena María Hernández Pereira, tamén en intelixencia artificial, e María José Lombardía Cortiña, en estatística.
En conxunto, estas investigadoras reflicten a diversidade temática do CITIC, con presenza en áreas como intelixencia artificial, computación, visión artificial, matemáticas, lingüística computacional ou optimización.
Máis de cen na UDC
A UDC suma un total de 102 investigadoras nesta clasificación, entre máis de 450 institucións nacionais e internacionais, o que, en palabras da Universidade da Coruña, “consolida o seu papel na investigación feminina de alto impacto”. Ademais, oito investigadoras da universidade sitúanse entre as 1.000 primeiras posicións.
O listaxe, promovida polo CSIC, pon en valor a actividade investigadora feminina mediante o uso de infraestruturas abertas e sistemas de identificación como ORCID ou ROR, impulsando a transparencia e a visibilidade do coñecemento científico.

Spotify adapta a súa plataforma para levar o vídeo a Apple Podcasts

Marcus Fernández — 2026-05-15T11:20:00Z

Spotify anunciou novas integracións para reforzar a distribución e monetización de videopodcast, ampliando o número de plataformas de hospedaxe compatibles e preparando a chegada da distribución de vídeo cara a Apple Podcasts.
A intención é facilitar a publicación de vídeo sen modificar os fluxos de traballo actuais. Os episodios continúan distribuíndose mediante RSS ás plataformas centradas en audio, mentres o vídeo súbese directamente a Spotify para aproveitar funcións específicas como estatísticas en tempo real, monetización baseada na interacción dos usuarios e ferramentas avanzadas de patrocinio.
Spotify tamén confirmou que Spotify for Creators e Megaphone adoptarán este ano a tecnoloxía HLS Video de Apple Podcasts. Isto permitirá que os videopodcast hospedados nas plataformas de Spotify poidan distribuírse tamén a Apple Podcasts sen necesidade de cambiar a configuración existente.
A compatibilidade coa tecnoloxía de Apple busca favorecer unha distribución máis independente das plataformas, permitindo chegar tanto aos usuarios de Spotify como aos de Apple Podcasts cun único sistema de publicación. Ademais, está previsto que Spotify xestione tamén a monetización do vídeo distribuído en Apple Podcasts, evitando que os creadores teñan que escoller entre alcance e ingresos.
Segundo Spotify, o crecemento do podcasting está cada vez máis ligado ao vídeo, polo que ampliar a presenza simultánea en varias plataformas incrementa a capacidade de descubrimento, a interacción co público e as posibilidades de obter ingresos adicionais.
No caso de que un creador decida deixar de publicar vídeo, Spotify permitirá volver a un sistema exclusivamente baseado en audio mediante RSS. Os episodios seguirán accesibles, aínda que desaparecerán as funcións específicas asociadas ao formato de vídeo, como a xestión de patrocinadores ou os anuncios integrados en vídeo.

O BNG pide investigar a actuación das compañías após o apagamento dixital en Xinzo e Verín

S. P. — 2026-05-15T11:00:00Z

A senadora do BNG, Carme da Silva Méndez, vén de rexistrar iniciativas para pedir ao Goberno do Estado que investigue a proceder das liñas de telefonía após o apagamento dixital que, segundo informou, deixou sen conexión durante case 24 horas a milleiros de persoas de Xinzo de Limia e Verín entre os días 7 e 8 de maio, e para reclamar “que as compañías de telecomunicacións indemnicen automaticamente ás persoas afectadas, tal e como estabelece a lexislación vixente”.
A senadora do BNG, Carme da Silva Méndez, sinalou que “o sucedido puxo de manifesto a enorme vulnerabilidade das comunicacións en comarcas enteiras e a absoluta falta de resposta e transparencia das operadoras afectadas”.
Nun plano máis concreto, informou tamén de que o corte masivo “deixou sen Internet e sen acceso a servizos esenciais a persoas usuarias de compañías como Vodafone, Lowi, Orange ou R, entre outras operadoras que comparten infraestrutura na zona”.
Engadiu que “as primeiras informacións apuntan a que a avaría podería terse producido por un corte accidental da rede durante unhas obras viarias en Xinzo de Limia, aínda que outras versións sinalan tamén os efectos da tormenta rexistrada ese día sobre os cables subterráneos da rede de transporte”.
O BNG subliña que as consecuencias foron “gravísimas” e “afectaron ao funcionamento de servizos sanitarios e administrativos”. Houbo dixo, “ambulancias sen capacidade para recibir alertas, farmacias con dificultades para acceder ás bases de datos de para dar medicamentos, persoas que estaban a teletraballar mais que estaban sen conexión, negocios paralizados e mesmo a suspensión da atención administrativa no propio Concello foron algunhas das incidencias rexistradas”.
Carme da Silva lembrou que o Real Decreto 899/2009, que regula a carta de dereitos das persoas usuarias dos servizos de comunicacións electrónicas, “establece claramente que as operadoras deben compensar automaticamente ás persoas abonadas cando a interrupción do servizo supera as seis horas entre as 8:00 e as 22:00 horas”.
Así, reclamou ao Ministerio de Transformación Dixital “que actúe de oficio, abra unha investigación inmediata e inspeccione o comportamento das operadoras”.
O Bloque demandou tamén que a Comisión Nacional dos Mercados e da Competencia investigue os feitos e “determine posíbeis sancións no caso de confirmarse incumprimentos da normativa vixente por parte das compañías de telecomunicacións”.

O asistente de IA do novo móbil de Sony marca o camiño do que fuxir

Marcus Fernández — 2026-05-15T10:40:00Z

Esta semana abríronse as reservas para facerse co Sony Xperia 1 VIII, un smartphone que prometía converterse nun dispositivo totalmente irrelevante, especialmente por non ter nada que xustificase o seu elevadísimo prezo (1.499/1.999 euros), pero que finalmente está a acaparar titulares, aínda que por nada positivo.
O novo smartphone de Sony presumía dun novo asistente de cámara con IA que recoñece as escenas para suxerir opcións como tons de cor, efectos de lente e expresións de desenfoque de fondo, que dende o equipo de comunicación e márketing de Sony non parecen entender, xa que nas imaxes de exemplo que publicaron en redes sociais e na páxina web do propio produto vemos todo o contrario ao que buscaría calquera usuario cun mínimo coñecemento fotográfico, estragando claramente as imaxes ao incrementar a exposición e o contraste e reducir a exposición das cores, ata conseguir imaxes moito máis pobres que as orixinais.
A publicación de Sony en X na que compartiron as fotografías de exemplo superou amplamente os 9 millóns de visualizacións nun día, con numerosos usuarios pensando que se debía de tratar dunha especie de broma para captar interaccións en redes sociais, pero o feito de que estas mesmas imaxes estean publicadas na páxina web do produto indicarían que non é o caso, e realmente estamos ante un produto desnortado, que non só non estaría fabricado pola propia Sony, senón que tamén fracasaría estrepitosamente á hora de atraer o único público que podería ter interese en facerse cun smartphone da marca nipoa (os amantes da fotografía, que son incondicionais das cámaras Sony Alpha).

: Os exemplos compartidos por Sony son todo un exemplo de como estragar unha imaxe procesándoa demasiado con IA

Curiosamente os exemplos do asistente de IA do smartphone no seu vídeo de presentación non cometen os erros das imaxes de exemplo

A Deputación de Ourense intégrase no ecosistema estatal de destinos intelixentes turísticos

S. P. — 2026-05-15T10:20:00Z


O Mosteiro de Santa Cristina, na Ribeira Sacra ourensá

A Deputación de Ourense vén de formalizar a súa adhesión ao nodo central da Plataforma Intelixente de Destinos (PID), impulsada por SEGITTUR, un fito clave para o proxecto Ourense Preto DeTI e reforza a integración da provincia no ecosistema estatal de plataformas intelixentes de destinos.
Segundo informou a Administración provincial, a conexión co nodo central permite “un avance efectivo” cara o intercambio de información e servizos dentro do marco común da PID, impulsando a evolución da plataforma provincial Hai un Ourense para TI, en liña cos estándares nacionais de destino turístico intelixente.
Explica que o proxecto Ourense Preto DeTI, seleccionado na convocatoria de axudas para destinos da Rede DTI e financiado polo Plan de Recuperación, Transformación e Resiliencia -NextGenerationEU (Compoñente 14)-, conta cun orzamento de 1.327.618,05 euros (IVE incluído). O seu obxectivo xeral é “consolidar Ourense como Destino Turístico Intelixente, mediante solucións dixitais que melloren a sustentabilidade, a accesibilidade e a experiencia do visitante, ao tempo que reforzan a competitividade do sector turístico local”.
No marco desta adhesión, a Deputación impulsa a integración de módulos e capacidades avanzadas da PID orientadas á gobernabilidade e á prestación de servizos dixitais, entre elas: a xestión do destino e cadros de mando para a toma de decisións baseada en indicadores; a xestión semántica de contidos e publicación multicanle; a intelixencia de localizacións e analítica para planificación sostible e mellor distribución de fluxos turísticos; ou servizos orientados ao visitante como asistencia virtual, reservas en liña e enquisas de satisfacción.
O proxecto contempla, ademais, o despregue e integración de casos de uso diferenciais vinculados ao termalismo, o Camiño de Santiago, enoturismo, turismo MICE e á accesibilidade dixital e posta en valor de recursos culturais, incluíndo solucións de visita autónoma a museos.
“A adhesión ao nodo central da PID permite a Ourense traballar con estándares e servizos comúns, activar casos de uso adaptados ao territorio e transformar datos en melloras reais para visitantes, concellos e tecido empresarial”, engade a Deputación.
Tras este fito, o proxecto continuará co despregue progresivo ata xuño de 2026, segundo o calendario previsto. Así, nos vindeiros meses está prevista a presentación pública da plataforma Ourense Preto DeTI, para trasladar a toda a cadea de valor turística da provincia os beneficios deste proxecto estratéxico.

A Insta360 GO 3S adopta aires retro

Redacción — 2026-05-15T10:04:32Z

A Insta360 GO 3S Paquete Retro chega como unha edición especial da pequena cámara persoal 4K de Insta360, que aposta por recuperar a estética e sensación de uso das cámaras de película clásicas. O novo paquete combina o formato ultracompacto da GO 3S cun visor retro, filtros inspirados na fotografía analóxica e distintos accesorios orientados a ofrecer unha experiencia máis pausada e táctil á hora de capturar imaxes e vídeo.
O conxunto está baseado na cámara independente de só 39 gramos, que mantén gravación en 4K, captura mans libres e estabilización FlowState. A proposta está orientada a creadores de contido, afeccionados á fotografía de rúa e usuarios interesados en rexistrar escenas cotiás cun estilo visual máis próximo ao das cámaras clásicas.
O elemento principal do paquete é o Visor Retro, un visor óptico de cintura que transforma a GO 3S nunha especie de cámara dixital retro inspirada nos modelos de película. O visor permite encadrar as tomas sen recorrer a unha pantalla, favorecendo unha aproximación máis deliberada á fotografía.
Tamén integra un pequeno espello frontal pensado para autorretratos.
A edición especial incorpora ademais unha batería externa que amplía a autonomía ata os 76 minutos de gravación e permite cargar o dispositivo mentres está en uso. Engádese tamén unha carcasa NFC que facilita abrir directamente a aplicación móbil de Insta360 achegando o smartphone á cámara, permitindo acceder rapidamente á previsualización, edición e configuración.
O paquete complétase cunha correa para transportar a cámara como colgante ou fixala a mochilas e accesorios, ademais do colgante magnético da marca, pensado para gravacións POV mediante fixación magnética á roupa.
A Insta360 GO 3S Paquete Retro incorpora tres filtros exclusivos inspirados na fotografía química. Película en negativo ofrece tons máis suaves e menor saturación; Película positiva incrementa contraste e intensidade cromática para lembrar ás diapositivas; mentres que Adhesivo A/C recrea efectos de película preexposta mediante patróns decorativos e cores retro.
A cámara suma tamén once perfís de cor integrados, entre os que se inclúen cinco novos estilos cinematográficos: NC, CC, GR-F, Mono e Vacacións vintage. Estes perfís permiten obter imaxes estilizadas directamente desde a cámara sen necesidade de edición posterior.
A aplicación móbil de Insta360 pasa a asumir funcións similares ás do Action Pod, permitindo controlar modos de captura, filtros e parámetros desde o teléfono. En iOS e Android tamén se incorporan funcións Live Activities para consultar rapidamente o estado da cámara e iniciar gravacións desde a pantalla bloqueada.
A pesar da orientación retro desta edición, a GO 3S mantén as prestacións habituais do modelo orixinal. Ademais da gravación en 4K con estabilización FlowState, ofrece resistencia á auga ata 10 metros de profundidade, sistema de montaxe magnética e función QuickCapture para iniciar a gravación premendo un único botón.
Tamén segue dispoñible FreeFrame Video, que permite exportar os vídeos en diferentes formatos verticais ou horizontais para redes sociais.
A Insta360 GO 3S Paquete Retro xa está dispoñible nas cores lenzo brancov e vermello clásico en versións de 64 e 128 GB, con prezos de 279 e 299 euros respectivamente. Se xa posuímos unha GO 3S tamén podemos adquirir o Visor Retro por separado a un prezo de 54,99 euros.

Vídeo promocional da Insta360 GO 3S Paquete Retro

A rapazada de Galiciencia participou nun desafío centrado na ciberseguridade

S. P. — 2026-05-15T09:40:00Z

A feira científica Galiciencia, organizada esta semana polo Parque Tecnolóxico de Galicia – Tecnópole coa protección tecnolóxica como temática principal, celebrou este xoves 14 de maio a final do desafío científico Atrévete coa ciberseguridade!, no que durante os últimos meses participou alumnado desde 4º de Primaria a Bacharelato de toda Galicia de xeito online.
Ao longo deste tempo propúxoselles aos rapaces participantes explorar o mundo dixital para entender como funciona e así evitar posíbeis riscos. Tiveron que resolver enigmas, superar probas técnicas e tomar decisións clave para poder avanzar nos diferentes retos desta competición.
Sumáronse a esta aventura un total de 338 equipos, integrados por 873 rapaces e rapazas de 63 centros educativos diferentes. Os que conseguiron pasar os tres retos da fase online competiron este xoves 14 nunha final presencial. Os equipos finalistas embarcáronse nunha misión moi particular: facer fronte a unha plataforma infectada. O primeiro paso foi poder abrir unha caixa forte, que contiña unhas tarxetas que lles daban acceso aos ordenadores. Para conseguir liberar o dispositivo afectado, tiveron que pasar unha serie de desafíos: descifrar claves, recuperar arquivos… ata lograr neutralizar o ataque.
O gañador na categoría de Primaria foi o equipo Os Ciberguardias, formado por Bernal Vilela e Xabier Villar, do CEIP Bibei de Viana do Bolo (Ourense). Na categoría de primeiro a terceiro de Secundaria gañou o equipo VortexVirtual, integrado por Amelia Vázquez, Leire Sampedro e Alicia Ferreira, do Colexio Eduardo Pondal de Cangas (Pontevedra). E na categoría de cuarto de Secundaria a Bacharelato os vencedores foron Tecnológicos, do que forman parte Iker Gómez, Iago Vidal e Alba Moimenta, do IES García Barros da Estrada (Pontevedra).
Entre as actividades que se están a desenvolver no marco da feira, o alumnado de Secundaria, Bacharelato e FP está a participar en varios obradoiros vencellados coa ciberseguridade. A través destas experiencias, búscase que a rapazada sexa consciente de que non son precisos grandes coñecementos técnicos nin contido sofisticado xerado por Intelixencia Artificial para que nos enganen, para que rouben os nosos datos ou suplanten a nosa identidade. Así, aprenderon a identificar riscos en Internet e nas redes sociais, a protexer a súa privacidade dixital e a recoñecer a desinformación e as noticias falsas.
Os participantes nestes obradoiros aprenderon ademais que o noso cerebro é vulnerábel á tecnoloxía, a cal que evoluciona con gran rapidez, ata o punto de que dispositivos de decodificación avanzada conseguen hackear a intimidade do pensamento humano.
No espectáculo de ciencia amosouse como calquera persoa pode ser vítima dun ciberataque, independentemente do seu nivel de coñecemento tecnolóxico.
Na mañá deste 14 de maio celebrouse un novo espectáculo científico, que os centros educativos galegos puideron seguir tamén en liña. O propósito desta experiencia é que os máis novos descubran que a ciencia pode ser atractiva e divertida para todos. Baixo o título Síntome seguro, transmitiuse como vivimos cunha falsa sensación de seguridade: “Pensamos que o mundo dixital é só unha extensión cómoda da vida diaria, cando en realidade está cheo de riscos que non se ven e que adoitan pasar desapercibidos”, sinalaron dende a Tecnópole.
Neste espectáculo amosouse como funcionan as ameazas máis habituais. Ademais, deixouse patente que calquera persoa pode verse afectada, con independencia do seu nivel de coñecemento tecnolóxico. A finalidade deste espectáculo científico é “fomentar unha actitude crítica e consciente, poñendo en valor a prudencia, a reflexión e os bos hábitos de uso nas contornas dixitais cotiás”, engadiu a Tecnópole.

DJI prepara unha cámara compacta estabilizada con 2 obxectivos

Marcus Fernández — 2026-05-15T09:23:16Z

Cando hai un mes DJI presentou a súa cámara compacta con estabilizador Osmo Pocket 4, decepcionou a moitos porque basicamente se trata dunha revisión da Osmo Pocket 3 con maior luminosidade e fidelidade cromática, cando se agardaba unha revolución que xustificase a renovación da cámara con este formato máis vendida da historia.
Pero o trebello que a xente estaba agardando levaba xa meses nas máis dalgúns creadores de contidos, polo que as filtracións sobre unha Osmo Pocket con dous obxectivos deixaban claro que DJI tiña un produto interesante no forno, que finalmente se confirmou cunha presentación en Cannes. Falamos da DJI Osmo Pocket 4P, que promete máis perspectivas e máis historias, grazas ao seu orixinal formato.
A futura DJI Osmo Pocket 4P segue a ser unha incógnita comercial (non se adiantou a súa data de lanzamento nin o seu prezo oficial), e o que comunicou DJI é que basicamente ofrece a mesma tecnoloxía da Osmo Pocket 4, presumindo dun «rango dinámico de nivel cinematográfico para unha rica profundidade tonal, xunto cun rendemento de cor 10 bits D-Log2 que permite fluxos de traballo profesionais de corrección de cor».
As posibilidades que abre a nova cámara é que, ao contar con dous obxectivos, permite unha visión ampla propia deste tipo de cámaras populares para a gravación de viaxes, ao que engade un obxectivo cun zoom óptico de 3 aumentos, o que facilita tomas máis próximas e persoais. O sistema permitiría a gravación simultánea con ambos obxectivos, polo que os creadores poderán escoller posteriormente as tomas que resulten máis acaídas en cada situación. Tamén integrará 107 GB de almacenamento interno, evitando así a dependencia de tarxetas microSD.
Cómpre salientar que a competencia de DJI, Insta360, tamén está a preparar unha cámara moi semellante, a Insta360 Luna Ultra, que contaría coa mesma combinación de obxectivos, amparada co selo de calidade de Leica, rumoreándose que o seu prezo de venda será de 1.050 euros, deixando claro que estamos ante un produto que busca algo máis que competir coas pequenas cámaras de viaxe.

Pint of Science encherá de divulgación unha manchea de establecementos das nosas cidades

S. P. — 2026-05-15T08:39:17Z

As universidades galegas e diferentes centros e entidades de divulgación e investigación prepararon un completo programa de actividades para conmemorar na nosa terra a nova edición de Pint of Science, o festival internacional de divulgación científica que leva a investigación aos bares co obxectivo de achegar a ciencia á cidadanía nun ambiente distendido e próximo. Celebrarase entre os días 18 e 20 de maio.
A UDC: dende A Coruña para a provincia
No caso da Universidade da Coruña (UDC), durante tres xornadas, persoal investigador do Centro Interdisciplinar de Química e Bioloxía (CICA), do Centro de Investigación en Tecnoloxías da Información e as Comunicacións (CITIC), do Centro de Innovación Tecnolóxica en Edificación e Enxeñería Civil (CITEEC), do Instituto de Investigación Biomédica da Coruña (INIBIC), do CSIC, do SERGAS e doutras entidades ofrecerán pequenas charlas divulgativas en distintos locais da cidade.
As sesións celebraranse no Bar Frei Caneca (Rúa Almirante Cadarso, 4) e no Bar Árnica (Rúa Ferrerías, 2), en horario de tarde e abordarán cuestións de grande actualidade relacionadas coa saúde, a tecnoloxía, o medio ambiente, a intelixencia artificial, a biomedicina ou a exploración espacial, entre outras temáticas.
No Bar Frei Caneca, as intervencións comezarán ás 19:00 horas. Entre os temas que se tratarán figuran a tecnoloxía para a inclusión social, os mecanismos do sistema inmune fronte ao cancro, a ciberseguridade baseada en intelixencia artificial, os materiais sostíbeis obtidos a partir da roupa usada ou o uso do GPS para coñecer a nosa posición no planeta.
Pola súa banda, o Bar Árnica acollerá, desde as 20:00 horas, relatorios centrados na dieta mediterránea aplicada á diálise, a refrixeración sostíbel, a antropoloxía do tatuaxe na era dixital, a revolución das terapias CAR-T, a biodiversidade mariña, a reparación do formigón mediante bacterias ou a información climática que achega o pole.
A participación do persoal investigador da UDC neste evento non se limita á cidade da Coruña. Outras localizacións como Ferrol, Carballo, Arteixo e Brión tamén contarán con relatorios impartidos por talento da Universidade.
No caso de Ferrol, a primeira das conferencias será o 18 de maio ás 19:00 horas en Cuerda Floja (Espartero, 1) e nela pedro Manuel Fernández, do Grupo Integrado en Enxeñaría falará sobre a enerxía eólica e o control dos incendios a través das matemáticas aplicadas. O martes 19, no Monique Coffee (Taxonera, 1) o investigador Ramón y Cajal Alejandro Blanco ofrecerá unha viaxe desde o pasado dos crocodilos aos videoxogos e as matemáticas; e o mércores 20, as investigadoras Lorena Acea e Lucia Santiago abordarán no Kiwi (Rúa Magdalena, 125), os labirintos da mente, a álxebra e o mar.
No Pint of Science de Carballo será o mércores día 20 ás 19:30 horas cando haxa unha conferencia sobre o autismo de man da docente Isabel García García. No Bar Latitud de Arteixo (R. das flores, 4) o martes 19 de 18:30 a 20:30 horas, a profesora Cristina Naya reflexionará sobre como entendemos as matemáticas a través de materiais manipulativos e a investigadora do CITEEC e Amal Nnechchi falará sobre o proxecto de recuperación do río Monelos. Xa o mércores 20 será a investigadora do CICA Elena Pazos quen participará no Bar La Ventana ás 18:30 horas para falar sobre os péptidos.
Por último, a investigadora do CICA Mª del Carmen Veiga Barbazán impartirá o luns 18 ás 18:00 horas no Novo Faro de Brión (Inxerido, 1), unha charla sobre como diferentes tecnoloxías permiten transformar residuos en bioplásticos e outros compostos de valor.
En Santiago
O festival Pint of Science volta o 18 de maio a Santiago con palestras que achegarán a ciencia máis punteira ao grande público en bares de Compostela. O festival celebrarase o día 18 no Café Bar Alborada de Veiga e os días 19 e 20 na Sala Riquela, a partir das 18:00 horas, cun total de 12 palestras científicas que cubrirán temáticas desde a física até á xestión cultural, pasando pola bioloxía molecular e a socioloxía.
Entre as persoas investigadoras que participan nesta edición de Pint of Science Compostela atópanse Anxo Méndez, que axudará aos presentes a descubrir como a luz se converte en algo máis que arte; Julio Esparís reflexionará sobre as políticas culturais municipais de Galicia; María Teresa Carrillo e Alejandro Quiroz presentarán os neuromitos da dor, e Noel Suárez explicará a transformación de moléculas a medicinas.
Un dos obxectivos da organización en Compostela é facilitar o diálogo directo entre o persoal investigador e a sociedade. Desde a coordinación do evento, a cargo de Alejandra García, Manuel Antonio González e Emi Vázquez Lage, salientan que esta iniciativa procura romper coas barreiras no acceso ao coñecemento científico, achegando as persoas que o xeran ao conxunto da cidadanía. Ademais, levar a ciencia a ambientes próximos e accesíbeis como os bares favorece o intercambio de ideas e a aprendizaxe colectiva.
Pint of Science Compostela realizará o luns un espectáculo de maxia cuántica no Café Bar Alborada de Veiga, e a gravación dun pódcast na sesión do mércores na Sala Riquela.
En Ourense (UVigo)
No caso da Universidade de Vigo, a cidade de Ourense súmase un ano máis á celebración do 18 ao 20 de maio dunha nova edición do festival divulgativo Pint of Science, que contará con arredor de 1.300 charlas e eventos en 114 cidades e municipios de toda España. O Café&Pop Torgal acollerá os tres días de programación conferencias divulgativas, abertas ao público xeral interesado, de seis investigadoras e investigadores do campus de Ourense e diferentes disciplinas.
Alén dos patrocinadores xerais da Pint of Science en España, no caso de Ourense tamén colaboran coa iniciativa a Vicerreitoría do campus, as facultades de Ciencias e Historia e a Área de Normalización Lingüística. O día 18, ás 18.00 horas, terá lugar a primeira sesión, que co título Ciencia para un futuro sostible: da terra á mesa achegarase “aos retos ambientais e de saúde que definen o noso tempo” e a como “a ciencia busca solucións innovadoras dende a base”. Nuno Muñoz, investigador do grupo BiotecnIA (Biotecnoloxía Industrial e Enxeñería Ambiental) abordará o potencial dos insectos comestíbeis como alternativa sostíbel ás proteínas tradicionais.
Seguiralle Sabela Pérez, do Grupo de Estudos en Traballo Social: Investigación e Transferencia, cunha charla sobre os mitos misóxinos na manosfera dixital. Na súa intervención analizará o impacto deste fenómeno, sobre todo en redes sociais e xurdido como reacción ao feminismo, e desentrañará algúns dos mitos e loias que difunde. Será, indica a investigadora, “unha oportunidade para entender como se constrúen estes discursos e aprender a detectalos cunha ollada crítica”.
O día 19, no mesmo lugar e á mesma hora, celebrarase a segunda sesión de Pint of Science Ourense co título Retos do século XXI: resistencia ambiental e innovación docente. “Desde o estudo de solucións ambientais e da saúde no noso solo ata a transformación do modelo educativo na era dixital, estas charlas exploran como a investigación de vangarda impulsa un futuro máis sostíbel e mellor conectado”, comentan desde a organización. Vanesa Santás, do grupo de investigación BV1 Pranta, Solo e Aproveitamento de Subprodutos, falará do solo e a resistencia aos antibióticos.
Pola súa banda, a Manuela Raposo, do grupo de investigación Cooperación en Investigación para a Equidade Educativa e Social, ofrecerá a charla Titorizar a Formación Dual na era dixital. Na charla analizará as condicións e como se titorizan estas prácticas, as ferramentas como os ePortafolios, as eRúbricas ou as videoanotacións para mellorar o seguimento, a comunicación e a avaliación; que riscos e oportunidades xorden ante o impacto da intelixencia artificial e se estamos preparados para asumir os novos retos neste eido.
A terceira e última sesión será o día 20, tamén ás 18.00 h no Café&Pop Torgal, e leva por título Alimentando o futuro: do mar á tradición. Nela explorarase “o potencial transformador de dous piares fundamentais da nosa contorna: o mar e as raíces culturais”. Adela Alvaredo, do grupo Bio2Val Biorefinería e Valorización da Biomasa, ofrecerá a conferencia Algas: da area ao prato.
Por último, María García, do grupo AA1 Investigacións Agrarias e Alimentarias, falará sobre o valor dos alimentos tradicionais. “Son moito máis que receitas: son cultura, saúde e sostibilidade. Nesta charla descubriremos por que o seu consumo se asocia a dietas máis equilibradas e como a súa produción local contribúe a reducir o impacto ambiental. Recuperalos non só protexe a biodiversidade, senón que tamén apoia as economías rurais e conéctanos co noso pasado”, afirma.
En Vigo
Pint of Science Vigo celebrarase no Bar El Castro e no Café De Catro a Catro, cun total de 14 charlas científicas que cubrirán un amplo abanico de temáticas, desde a tecnoloxía, a biomedicina e a química ata o estudio do planeta e a lingüística.
Entre as persoas investigadoras e científicas que participan nesta edición de Pint of Science Vigo, destacan nomes como María Mayán, quen abordará os avances máis recentes na investigación do cancro, os baleiros de coñecemento que aínda persisten e os grandes retos pendentes para lograr curalo ou convertelo nunha enfermidade crónica; Antonio Figueras, que descubrirá o sorprendente “superpoder” do mexillón para sobrevivir a condicións extremas e as leccións que pode aportar tanto á ciencia como á sociedade; e Saida Ortolano, cunha charla que porá o foco nas enfermidades raras, os seus avances e desafíos, e en como o seu estudio resulta clave para entender mellor procesos fundamentais do organismo e de enfermidades moito máis frecuentes.
Un dos obxectivos da organización en Vigo é establecer o diálogo directo entre os investigadores e investigadoras e a sociedade. Reyes Riveiro, responsable de comunicación do equipo de Vigo, subliña que “a miúdo asociamos a ciencia con algo complexo ou afastado, cando en realidade o problema moitas veces está en como se conta. En Pint of Science rompemos con esa idea levando a ciencia aos bares e comunicándoa nunha linguaxe clara, próxima e sen barreiras. Ese ambiente distendido invita a participar, a preguntar sen medo e a descubrir que incluso as ideas máis complexas poden entenderse e gozarse de forma sinxela”.
Unha cita internacional e simultánea coa ciencia en todo o mundo
Pint of Science é unha iniciativa internacional que se celebra simultaneamente en preto de 500 cidades e 27 países de todo o mundo e que busca crear espazos de encontro entre a comunidade científica e a sociedade, promovendo a cultura científica e o pensamento crítico a través dun formato próximo e participativo.
Naceu no ano 2012 da man dos científicos Praveen Paul e Michael Motskin, investigadores do Imperial College de Londres (Reino Unido), quen organizaron un encontro chamado Coñece aos Investigadores, con persoas afectadas por Parkinson, Alzheimer, esclerose lateral amiotrófica e esclerose múltiple para que puidesen visitar os seus laboratorios e mostrarlles as súas investigacións. Este inspirador encontro serviulles para proporse a idea de achegar aos científicos á xente, e xa en maio de 2013 celebraron o primeiro Pint of Science en tres cidades do Reino Unido. O festival estendeuse rapidamente por todo o mundo, ata chegas ás cifras actuais.

A VIII edición do Congreso Flúor pon o foco no novo talento

S. P. — 2026-05-15T07:57:07Z

Este xoves 14 de maio inaugurouse en Pontevedra a VIII edición do Congreso Flúor, un dos principais encontros do sector da comunicación, a mercadotecnia dixital e a creatividade en Galicia, que reúne medio milleiro de profesionais na cidade do Lérez nun marco-programa de actividade ateigado de entrevistas, conferencias e mesas redondas.
O congreso, que se celebra ata este venres 15 baixo o lema O valor de elixir, conta coa presenza de expertos tan destacados como Javier Campopiano, un dos máis prestixiosos creativos a nivel internacional, presente no acto de apertura, Ester Morell, directora de Marketing e Comunicación de Ilunion, Santiago Miguélez, director de Marketing de Estrella Galicia, Nacho Padilla, director da marca Renfe, ou a galega Adriana Domínguez, presidenta executiva de Adolfo Domínguez.
O programa de actividades deste ano inclúe encontros “dinámicos” co alumnado do Campus de Pontevedra (UVigo) con vistas a fomentar as fichaxes de novos talentos no sector, ou a I Olimpíada de Creatividade, na que se implicarán cen estudantes afrontando un desafío achegado por Nacho Padilla para a marca Avlo de Renfe.
Na apertura das actividades participaron entre outros o conselleiro de Cultura, José López Campos, o conselleiro de Emprego, José González, o director de Turismo de Galicia, Xosé Merelles, ou o presidente da Deputación de Pontevedra, Luis López.
Durante a súa intervención, o conselleiro de Cultura destacou a contribución do sector da publicidade “á difusión e prestixio da imaxe de Galicia Calidade que tanto e tan ben no representa e nos identifica”. Ademais, gabou os estilos creativos das campañas deste sector “nas que se capta con orixinalidade a esencia que define a nosa Comunidade, que coida e bebe da tradición e respecta o legado dos nosos antepasados, pero que non deixa de innovar e mudar sen perder nunca a orixe”.
Pola súa banda, Luis López, acompañado polo vicepresidente Rafa Domínguez, destacou a estratexia de innovación que está a desenvolver o Goberno provincial para impulsar a provincia en eidos como o turismo ou o deporte, salientando tamén a estrea dunha plataforma dixital, DepoPlay, para divulgar o labor da Deputación empregando novos formatos que chegan á xente máis nova. “Na Deputación estámonos abrindo ao ecosistema creativo e ao talento da provincia porque entendemos que a casa de todos os pontevedreses e pontevedresas ten que ser tamén a casa da creatividade. Moitas das firmas que estades hoxe aquí xa o sabedes, porque xa colaborades con nós”, declarou o mandatario provincial no acto de inauguración do Congreso Flúor, que celebra a súa oitava edición estes días en Pontevedra.

A Xunta avalía con representantes da infancia as novas medidas recollidas no anteproxecto da primeira Lei de violencia dixital

Redacción — 2026-05-15T07:00:00Z

O director xeral de Loita contra a Violencia de Xénero, Roberto Barba, e a directora xeral de Promoción da Igualdade, María Quintiana, mantiveron unha reunión con dous integrantes do Consello Autonómico da Infancia e da Adolescencia (CAIA), Beatriz Mariahn Comesaña e Iván Alejandro Cruz, para analizar algunhas das medidas incluídas no anteproxecto da primeira Lei de Violencia e Acoso Dixital de Galicia, que prevé unha protección específica para a mocidade.
Durante o encontro, explicaron que o texto impulsado pola Xunta pretende converterse no primeiro marco normativo de España e de Europa orientado á regulación dos delitos cometidos na rede que afectan especialmente á mocidade, ás mulleres e ao colectivo LGBTI. Nese sentido, destacaron que un dos piares da futura lei será un plan formativo dirixido aos axentes sociais que estean en contacto coas posibles vítimas, coa finalidade de proporcionarlles máis ferramentas e recursos para reforzar a protección e definir pautas de actuación fronte a este tipo de delitos.
Roberto Barba e María Quintiana subliñaron tamén a importancia de implicar á mocidade en todo o proceso, ao tratarse dun dos colectivos máis expostos aos delitos dixitais. Así, trasladáronlles que o papel dos representantes da infancia e da adolescencia galega será clave tanto na posta en marcha da norma como unha vez entre en vigor, ao seren axentes fundamentais na difusión das medidas de prevención e sensibilización e dos recursos de atención e protección.
Os representantes do CAIA aproveitaron igualmente a reunión para expor algunhas das principais preocupacións da mocidade en materia de igualdade, entre elas a educación afectivo-sexual e a incorporación da perspectiva de xénero nos itinerarios educativos. Roberto Barba e María Quintiana detallaron algúns dos recursos cos que conta a Xunta neste ámbito, como os centros Quérote +, centrados no asesoramento para a construción de relacións afectivo-sexuais igualitarias, así como iniciativas desenvolvidas nos institutos galegos, caso do programa O machismo é violencia, que leva ás aulas o testemuño directo de mulleres vítimas de violencia machista para sensibilizar ao alumnado.
Na reunión tamén se abordaron cuestións relacionadas coa seguridade das mulleres en determinados espazos públicos ao aire libre. Os directores xerais explicaron que a Xunta está a incorporar a perspectiva de xénero nos novos proxectos, como sucede no aparcadoiro de camións de San Cibrao das Viñas, en Ourense, que inclúe espazos seguros e diferenciados para as condutoras.
Outra das preocupacións trasladadas pola mocidade foi a necesidade de impulsar novos referentes femininos en ámbitos como o deporte. María Quintiana animou os representantes do CAIA a coñecer e divulgar a plataforma Presentes, unha iniciativa da Xunta creada para visibilizar mulleres profesionais de Galicia que desempeñan un papel destacado en distintos sectores, incluídos algúns tradicionalmente masculinizados, sen contar aínda co recoñecemento que lles corresponde.

Canon aposta polo vídeo profesional portátil coa nova cámara EOS R6 V

Redacción — 2026-05-13T21:00:00Z

Canon presentou a nova Canon EOS R6 V, unha cámara Full Frame da serie EOS V deseñada especificamente para a creación de vídeo, acompañada do obxectivo RF20-50mm F4 L IS USM PZ e dunha nova liña de accesorios orientados a creadores de contido e videógrafos avanzados. A proposta céntrase nun formato compacto pensado para gravación sen trípode nin gimbal, combinando estabilización integrada, gravación 7K e ferramentas profesionais de captura.
A EOS R6 V incorpora un sensor CMOS Full Frame de 32,5 megapíxeles capaz de gravar vídeo RAW 7K a 60 fotogramas por segundo, ademais de 7K Open Gate a 30 fps, unha funcionalidade que permite aproveitar toda a superficie do sensor para reencadrar posteriormente contido horizontal e vertical desde a mesma toma. Tamén ofrece gravación 4K sobremostreada ata 60 fps e vídeo 4K a 120 fps sen recorte para secuencias a cámara lenta.
O sistema Dual Pixel CMOS AF II integra seguimento avanzado de suxeitos orientado ao vídeo, mentres que o estabilizador integrado no corpo promete ata 7,5 pasos de compensación con obxectivos compatibles. Canon destaca especialmente o seu uso portátil, cun corpo compacto, empuñadura ergonómica e compatibilidade con gravación vertical grazas a unha rosca de trípode específica para ese formato.
Entre os elementos orientados á produción audiovisual figuran un ventilador interno para prolongar as sesións de gravación, audio de catro canles, perfís Canon Log 2 e Canon Log 3 para ampliar o rango dinámico e funcións de retransmisión UVC 4K a 60 fps mediante USB. Tamén permite disparos en refacho de ata 40 fps para fotografía.
Acompañando á cámara chega o RF20-50mm F4 L IS USM PZ, un novo obxectivo da serie L para montura RF que introduce zoom motorizado integrado sen precisar accesorios adicionais. A súa distancia focal abrangue desde os 20 mm ultra gran angular ata os 50 mm, mantendo apertura constante f/4 en todo o percorrido.
O sistema de zoom pode alternar entre control manual e motorizado desde un único anel, mentres que o deseño óptico interno mantén estable o centro de gravidade, algo especialmente relevante para uso con gimbals. Canon tamén salienta a posibilidade de controlar remotamente o zoom mediante a aplicación Camera Connect ou mandos Bluetooth como os novos BR-E2 e BR-E1.
A nova gama complétase con varios accesorios orientados á creación de contido. O mando BR-E2 introduce control Bluetooth Low Energy con funcións de zoom e compensación de exposición, mentres que o HG-200TBR combina trípode e empuñadura para gravación horizontal e vertical, incorporando controis dedicados para vídeo. Tamén se anunciou o conxunto AD-M1 Macro Lite Adapter Set, pensado para iluminación macro e control creativo con flashes.
A Canon EOS R6 V estará dispoñible a finais de xuño a un prezo de 2.499,99 euros só o corpo, mentres que o kit co obxectivo RF20-50mm F4 L IS USM PZ custará 3.699,99 euros.

Vídeo de presentación da nova cámara de Canon

O CITIC súmase a Pint of Science 2026 na Coruña con dúas propostas sobre ciberseguridade e historia do GPS

S. P. — 2026-05-13T20:30:00Z

O CITIC da Universidade da Coruña participará nunha nova edición de Pint of Science 2026 con dúas charlas divulgativas que achegarán ao público cuestións relacionadas coa intelixencia artificial aplicada á ciberseguridade e o funcionamento do GPS.
As sesións celebraranse no Bar Frei Caneca os días 19 e 20 de maio, dentro da programación do festival na cidade.
O vindeiro 19 de maio, Rubén Pérez Jove impartirá a charla Non me andes máis nos.… paquetes: ciberIA na rede. O investigador do CITIC explicará de maneira sinxela como a intelixencia artificial pode analizar o tráfico de rede para detectar ameazas e mellorar a ciberseguridade. A sesión achegará ao público xeral a investigación que desenvolve no marco da súa tese de doutoramento e mostrará como a IA pode contribuír a crear redes máis seguras.
O mércores 20 de maio será a quenda de Das estrelas ao GPS: como sabemos onde estamos, charla impartida por Carlos J. Escudero. Durante a sesión realizarase un percorrido desde os antigos sistemas de navegación mediante estrelas e sextantes ata os actuais satélites equipados con reloxos atómicos. Ademais, o público poderá descubrir como o teléfono móbil calcula a súa posición e que retos científicos e tecnolóxicos hai detrás dunha acción cotiá como usar o GPS.
A apertura de portas será ás 18:30 horas e as actividades desenvolveranse entre as 19:00 e as 21:00 horas.
A celebración de Pint of Science 2026 terá lugar os días 18, 19 e 20 de maio. Trátase dun festival internacional que achega a investigación científica á cidadanía a través de charlas divulgativas en bares e outros espazos informais.
Tras o éxito acadado en 2025 (con máis de 19.300 asistentes, actividade en 73 localidades, máis de 170 bares participantes e preto de 1.000 investigadores e investigadoras implicados) o festival consolídase como unha plataforma para impulsar vocacións científicas, fomentar a transferencia de coñecemento, dar visibilidade ás mulleres na ciencia e combater a desinformación.

Meta lanza globalmente Instants

Redacción — 2026-05-13T20:00:00Z

Meta anunciou o lanzamento global de Instants, a nova funcionalidade e aplicación independente de Instagram orientada ao intercambio de fotografías efémeras e espontáneas entre amigos. A ferramenta, que xa levaba semanas en probas en España e Italia, amplía agora a súa dispoñibilidade internacional tanto como función integrada en Instagram como mediante unha app específica para Android e iOS.
Instants busca reforzar o intercambio de imaxes naturais e inmediatas, apostando por un formato no que as fotografías desaparecen despois de seren vistas ou transcorridas 24 horas. O sistema impide editar as imaxes antes do envío e tampouco permite empregar fotografías almacenadas na galería do teléfono, xa que as capturas deben realizarse en tempo real desde a cámara integrada.
O acceso a Instants pode facerse desde a propia aplicación de Instagram, mediante unha pequena morea de fotografías situada na bandexa de entrada, ou directamente desde a aplicación independente, que abre de maneira inmediata a cámara. As imaxes poden compartirse con amigos seleccionados ou con seguidores mutuos, que teñen a posibilidade de responder con emojis, mensaxes ou novas fotografías temporais.
Meta tamén incorporou varias funcións adicionais para facilitar o uso continuado do servizo. As fotografías enviadas quedan almacenadas durante un ano nun arquivo privado accesible unicamente polo usuario, desde o que tamén se poden crear recompilacións para publicar nas historias de Instagram. Ademais, inclúese un sistema para desfacer envíos antes de que o destinatario abra a imaxe e unha opción para silenciar temporalmente a recepción de novas fotografías.
Entre as medidas de privacidade destaca a imposibilidade de realizar capturas de pantalla ou gravacións das imaxes compartidas. Instants herda igualmente os sistemas de seguridade de Instagram, incluíndo bloqueo, restrición, filtrado de contidos e ferramentas de denuncia.
Os controis específicos para adolescentes tamén forman parte da proposta. O servizo intégrase automaticamente coas Teen Accounts de Instagram e co Family Center, de xeito que os límites de tempo, o modo descanso nocturno e a supervisión paterno se aplican igualmente á nova aplicación. Os pais recibirán ademais unha notificación cando un menor supervisado descargue Instants por primeira vez.
O lanzamento definitivo confirma que o experimento iniciado en España non quedará simplemente como unha función secundaria dentro de Instagram, senón que contará cunha aplicación propia para competir directamente con plataformas como Snapchat ou BeReal no segmento da fotografía efémera e espontánea.

PlayStation Plus incorpora en maio Star Wars Outlaws e Red Dead Redemption 2

Redacción — 2026-05-13T19:30:00Z

Sony anunciou os xogos que se incorporarán ao catálogo de PlayStation Plus Extra e Premium o vindeiro 19 de maio, cunha selección encabezada por Star Wars Outlaws, Red Dead Redemption 2, Bramble: The Mountain King e The Thaumaturge. A actualización tamén suma propostas como Flintlock: The Siege of Dawn, Broken Sword – La Leyenda de los Templarios: Reforged e Enotria: The Last Song.
Star Wars Outlaws chega a PS5 como o primeiro xogo de mundo aberto ambientado no universo de Star Wars. A aventura segue a Kay Vess, unha delincuente novata que busca abrirse paso entre sindicatos criminais mentres percorre distintos planetas da galaxia.
Tamén retorna ao servizo Red Dead Redemption 2, o western de mundo aberto de Rockstar Games. O título sitúa aos xogadores nos últimos días do Salvaxe Oeste estadounidense, seguindo a Arthur Morgan e a banda de Van der Linde na súa fuxida tras un atraco frustrado.
A versión incluída incorpora igualmente o modo multixogador Red Dead Online.
Entre as propostas máis sombrías figura Bramble: The Mountain King, unha aventura inspirada no folclore nórdico na que Olle debe rescatar á súa irmá dun trol mentres explora bosques e cavernas habitadas por criaturas hostís.
A selección de maio incorpora tamén The Thaumaturge, xogo de rol ambientado na Varsovia de comezos do século XX. O protagonista, Wiktor Szulski, emprega habilidades místicas e criaturas chamadas salutores para influír na mente doutros personaxes e participar en combates tácticos por quendas.
Flintlock: The Siege of Dawn aposta pola acción tipo soulslike cunha combinación de armas de fogo, maxia e combates contra deuses nun mundo fantástico devastado pola guerra.
Os clásicos da aventura gráfica tamén teñen presenza con Broken Sword – La Leyenda de los Templarios: Reforged, unha versión remasterizada da obra de Revolution Software que recupera a investigación de George Stobbart e Nico Collard arredor dunha conspiración vinculada aos cabaleiros templarios.
Completa a listaxe principal Enotria: The Last Song, xogo de rol de acción inspirado no folclore italiano que propón cambiar entre distintas máscaras para adquirir habilidades e estilos de combate diferentes.
Os usuarios de PlayStation Plus Premium recibirán ademais Time Crisis, adaptación do clásico arcade de disparos lanzado orixinalmente en PlayStation en 1997. Esta nova versión para PS4 e PS5 incorpora control mediante xiroscopio e contidos exclusivos da edición doméstica orixinal.

596 centros de toda Galicia participarán o vindeiro curso en E-Dixgal

Redacción — 2026-05-13T19:00:00Z

O vindeiro curso o programa de ensino híbrido E-Dixgal contará coa participación dun total de 596 centros de Primaria e Secundaria de toda Galicia. A Consellería de Educación, Ciencia, Universidades e FP incorporará á iniciativa, a petición dos propios centros, dous novos colexios, mentres que outros tres abandonarán o proxecto de maneira voluntaria.
Os novos centros que se suman ao programa son o CEIP de Castrelo de Miño (Castrelo de Miño, Ourense) e o CEIP de Valeixe (A Caniza, Pontevedra). Pola contra, deixarán de participar o CEIP de Zalaeta (A Coruña), o CEIP Península da Paz (Cervo) e o IES Martaguisela (O Barco de Valdeorras).
O CPI Uxío Novoneira (Pedrafita do Cebreiro) tamén modificará a súa participación, ao abandonar E-Dixgal en Primaria e mantelo en Secundaria. Ademais, o CEIP Plurilingüe Eladia Mariño (Cabanas) solicitou a saída do programa, aínda que continúa dentro do período de permanencia obrigatoria, polo que unha comisión avaliará a viabilidade da petición.
A adhesión e saída do proxecto E-Dixgal é voluntaria para os centros, sempre que cumpran unha serie de condicións, entre elas contar co respaldo previo do Claustro e do Consello Escolar, no que están representadas as familias. Tamén deben ter completado o período mínimo de permanencia establecido.
A Xunta continúa ademais co proceso de mellora do programa co obxectivo de reforzar o seu carácter híbrido. Neste sentido, a Consellería ten actualmente en licitación un contrato de máis de 1,1 millóns de euros destinado a dotar os centros participantes de recursos educativos impresos e material didáctico en formato físico a partir do próximo curso. Estes contidos, elaborados por editoriais en soporte papel, incluirán fichas didácticas, materiais de repaso e ampliación e propostas prácticas adaptadas aos distintos niveis e áreas curriculares.
Os novos materiais complementaranse con formación específica para o profesorado sobre o uso pedagóxico do modelo híbrido, a integración equilibrada de recursos dixitais e analóxicos, a aplicación de metodoloxías activas e competenciais e o aproveitamento do material manipulativo e doutros recursos didácticos. As familias tamén recibirán información mediante xornadas e talleres centrados no uso responsable da tecnoloxía e no acompañamento educativo do alumnado.
Desde este curso, as familias con fillos incluídos en E-Dixgal poden acceder tamén ao fondo solidario de libros de texto, permitindo así que o alumnado dispoña tanto de manuais dixitais como en papel. Esta medida está dirixida a fogares con rendas iguais ou inferiores a 10.000 euros per cápita. Para as rendas superiores ata os 30.000 euros per cápita, existe unha dedución fiscal de ata 105 euros por fillo.
A utilización de libros en papel segue a ser, en todo caso, unha decisión voluntaria de cada centro, que pode incorporar ata tres manuais en Primaria e dous en Secundaria con cargo ao fondo solidario.

A Sony α7R VI contará cun sensor de 66,8 megapíxeles

Redacción — 2026-05-13T19:00:00Z

Sony anunciou a Alpha 7R VI, a sexta xeración da súa serie de cámaras sen espello orientada á fotografía de alta resolución, que combina un sensor CMOS Exmor RS retroiluminado e totalmente empillado de 66,8 megapíxeles efectivos co procesador BIONZ XR2, apostando por melloras tanto na velocidade de procesamento como na precisión do enfoque e na gravación de vídeo.
A cámara incorpora unha unidade de procesamento de IA integrada, capaz de realizar ata 60 cálculos de enfoque automático e exposición por segundo, mentres que a lectura do sensor resulta aproximadamente 5,6 veces máis rápida ca no modelo precedente. Isto permite disparo continuo de ata 30 fotogramas por segundo sen interrupcións e un seguimento avanzado de persoas baseado na análise da postura e do esqueleto.
O sensor ofrece ata 16 pasos de rango dinámico e Sony asegura unha redución do ruído especialmente perceptible nos niveis medios de sensibilidade. A estabilización óptica de 5 eixes alcanza ata 8,5 pasos de compensación no centro da imaxe e 7 pasos na periferia.
A Sony α7R VI integra tamén un novo sistema automático de balance de brancos apoiado nun sensor de luz visible e infravermella e en algoritmos de aprendizaxe profunda, orientado a manter cores naturais tanto en interiores como en escenas con sombra.
A autonomía mellora grazas á nova batería NP-SA100 de 2.670 mAh, coa que se poden capturar ata 710 fotografías empregando a pantalla LCD ou unhas 600 usando o visor electrónico segundo o estándar CIPA. O visor OLED acada 9,44 millóns de puntos, compatibilidade coa gama cromática DCI-P3 e HDR de 10 bits, cun brillo máximo que triplica o de modelos anteriores.
A gravación de vídeo permite capturar contidos en 8K a 30 imaxes por segundo mediante sobremostraxe desde 8,2K, así como vídeo 4K a 60 e 120 fotogramas por segundo sen recorte. A xestión térmica permite rexistrar vídeo 8K de maneira continua durante ata 120 minutos.
A serie Alpha incorpora por primeira vez a función Dual Gain Shooting, deseñada para reducir o ruído sen perder detalle nas sombras. Tamén se renovou a estabilización electrónica para mellorar a compensación nos movementos de balanceo, mentres que o modo Dynamic Active busca ofrecer gravacións máis estables cámara en man.
Entre as novidades orientadas ao fluxo profesional figura a compatibilidade coa solución Camera Authenticity Solution de Sony baseada no estándar C2PA, destinada a verificar que as fotografías e vídeos foron capturados realmente coa cámara e non xerados mediante intelixencia artificial.
O corpo está construído en aliaxe de magnesio e incorpora unha pantalla LCD multiángulo de 4 eixes, botóns traseiros iluminados e dous portos USB-C para carga e transferencia de datos simultáneas.
A Sony α7R VI (ILCE-7RM6) chegará ao mercado a partir do 27 de maio a un prezo de 5.100 euros.

Vídeo de presentación da nova cámara de Sony

A Xunta garante o compromiso coa especialización tecnolóxica de Galicia

Redacción — 2026-05-13T18:21:12Z

O conselleiro de Facenda e Administración Pública, Miguel Corgos, reivindicou hoxe, durante a inauguración da cuarta edición do Foro Empresa e Intelixencia Artificial da Coruña (organizado por Quincemil) a aposta da Xunta pola especialización tecnolóxica e pola soberanía dixital de Galicia, cun sector TIC competitivo e adaptado ás necesidades do territorio.
Corgos destacou o papel clave das empresas tecnolóxicas neste proceso e garantiu que seguirán contando co respaldo do Goberno galego. Neste sentido, lembrou que o número de empresas TIC medrou en Galicia máis dun 7 % nos últimos cinco anos, o que consolida a comunidade como a quinta rexión con maior número de compañías deste ámbito.
Como mostra do compromiso da Xunta coa intelixencia artificial, o conselleiro puxo en valor a aprobación en 2025 da lei para o desenvolvemento e impulso da IA en Galicia, converténdose na primeira rexión europea cunha normativa propia nesta materia. Tamén salientou a creación do Consello Galego de IA, no que participan a Administración autonómica, representantes do sector e o ecosistema de coñecemento das universidades galegas, así como a posta en marcha do Programa Galego de IA 2026-2028. Este plan, dotado con 54 millóns de euros, servirá como folla de ruta para estender o uso desta tecnoloxía na administración, nas empresas e na vida diaria da cidadanía.
Sobre este programa, asegurou que permitirá ofrecer unha Administración máis eficaz, personalizada e accesible, mediante sistemas intelixentes de atención á cidadanía, asistentes virtuais capaces de informar sobre trámites e procedementos, así como ferramentas de xestión e automatización orientadas a facer máis áxiles e simples os procesos administrativos.
Corgos incidiu en que moitos destes obxectivos xa se están materializando a través de sistemas destinados á interpretación de probas radiolóxicas na sanidade, á mellora dos diagnósticos nos cribados de distintos tipos de cancro, á monitorización do benestar e da saúde de persoas maiores ou con discapacidade, ou á conexión entre ofertas de emprego e demanda laboral en función dos perfís profesionais.
Tamén destacou a liña de axudas IA360, centrada na optimización das cadeas de valor e na mellora da produtividade empresarial mediante a aplicación da intelixencia artificial.

Os centros tecnolóxicos galegos captaron preto de 50 millóns de euros

S. P. — 2026-05-13T14:00:00Z

Os centros tecnolóxicos galegos captaron 49 millóns de euros para Investigación, Desenvolvemento e Innovación en 2025, uns resultados que reforzan o seu papel fundamental no avance da Galicia Calidade. Os centros Aimen, ANFACO-CYTMA, CETIM, CTAG, Gradiant e ITG (Instituto Tecnolóxico de Galicia), que conforman a Alianza Tecnolóxica Intersectorial de Galicia (ATIGA), lograron 33 millóns en convocatorias nacionais e autonómicas e 16 millóns en fondos europeos. Amais, conseguiron uns ingresos conxuntos de 117,8 millóns.
O conselleiro de Educación, Ciencia, Universidades e Formación Profesional, Román Rodríguez, destacou na presentación de resultados o papel fundamental que desempeñan os centros tecnolóxicos galegos no impulso á I+G+i galega.
Román Rodríguez, acompañado do presidente de ATIGA, Jesús A. Lago ; o director xeral, Fernando Val, e a directora da Axencia Galega de Innovación (GAIN), Carmen Cotelo, resaltou “a capacidade dos centros tecnolóxicos galegos para captar fondos en convocatorias altamente competitivas a nivel europeo, nacional e autonómico”.
Ademais, subliñou “o papel destes axentes na dinamización da innovación empresarial, colaborando como socios do tecido produtivo en proxectos estratéxicos”.
Salientou tamén o impacto económico dos centros tecnolóxicos integrados en ATIGA, “que contribúen ao desenvolvemento social, dando emprego a preto de 1.900 persoas de 36 nacionalidades, con máis de 500 proxectos de I+D+i cada ano”.
Lembrou ademais que “co obxectivo de fomentar a transferencia de tecnoloxía ao tecido produtivo e a internacionalización da I+G+i”, a Xunta de Galicia leva colaborando con ATIGA desde 2015, a través de convenios de colaboración que suman un apoio de 1 millóns. Ademais, dixo, “apoiamos con máis de 200 millóns de euros desde 2009 aos centros tecnolóxicos que conforman esta alianza”. Como exemplos dos avances dos centros tecnolóxicos, Aimen coordinou desde O Porriño o proxecto europeo Caelestis para avanzar cara unha aviación máis limpa e con menores emisións. Este centro validou un demostrador aeronáutico a escala real que reduce un 35% o peso e un 80% os defectos de fabricación. ANFACO-CYTMA desenvolveu en Vigo o primeiro prototipo industrial para a produción intelixente de microalgas e CETIM, ubicado en Culleredo, validou en distintas zonas de Europa tecnoloxía propia para mitigar os efectos do cambio climático no ciclo da auga.
Pola súa parte, o CTAG, centro situado no Porriño, impulsou un servizo piloto de shuttle autónomo e eléctrico como solución de mobilidade intelixente no Campus de Vigo e o centro Gradiant, situado en Vigo e centrado nas TIC, liderou Blossom, un proxecto orientado ao deseño de sistemas fotónicos autónomos, ultraeficientes e de baixo consumo, con aplicación directa en intelixencia artificial, telecomunicacións e sector aeroespacial.
Pola súa banda, o ITG desenvolveu desde A Coruña para Abanca unha solución avanzada de prevención de incendios forestais baseada en hangares robotizados con drons autónomos e instalada en tres puntos críticos de Galicia con elevado risco de incendios.

Arrinca Galiciencia 2026 con mancheas de proxectos innovadores e sorprendentes

S. P. — 2026-05-13T11:40:00Z

Galiciencia, a feira científica escolar organizada polo Parque Tecnolóxico de Galicia (Tecnópole), abriu as súas portas este mércores 13 de maio coa ciberseguridade como tema central das actividades previstas. O seu obxectivo é espertar as vocacións científicas entre o alumnado de Primaria, Secundaria, Educación Especial, FP e Bacharelato.
O certame, que se desenvolve en colaboración coa Consellería de Economía e Industria, vai reunir ata o venres a máis de 3.500 participantes en torno ás diferentes actividades programadas.
Nesta edición participan 104 proxectos: 50 presenciais e 20 en liña de Secundaria e Bacharelato; e 30 presenciais e 4 en liña de Primaria.
Segundo informou a organización, hai propostas moi variadas e dos eidos máis diversos, “aínda que a maioría céntranse na ciberseguridade”.
Así, un equipo ideou un labirinto interactivo que simula o interior dun dispositivo, para ensinar á mocidade a protexer a súa identidade dixital.
Ademais, hai varias aplicacións para evitar estafas e poder navegar na Rede de xeito seguro; outra permite analizar as fotos antes de publicalas co fin de detectar riscos para a privacidade; unha páxina web determina en tempo real a seguridade dos contrasinais…
Tamén destaca un semáforo impreso en 3D que transforma o risco dixital en sinais visuais e sonoros. E, ademais, un grupo está a poñer a proba aos asistentes, demostrando como a intelixencia artificial é capaz de crear imaxes, sons e mesmo olores que identificamos como reais.
Tocando xa outras temáticas, a Tecnópole tamén destaca proxectos como unha caixa intelixente para transportar os restos que aparecen nos xacementos arqueolóxicos ou un gran xogo dixital que consiste na construción dunha maqueta interactiva dun centro educativo para axudar a resolver e comprender conceptos matemáticos de xeito lúdico.
Ademais, un grupo desenvolveu un museo virtual para dar a coñecer a riqueza histórica do seu concello e outros novos investigadores construíron unha caixa de Faraday, que anula o campo eléctrico no seu interior, para gardar os teléfonos móbiles na aula.
A maiores, un equipo deseñou emisoras de radio caseiras, independentes da rede eléctrica, de utilidade nunha situación de emerxencia na que fallen os sistemas de comunicación habituais.
Ademais, son varios os proxectos vencellados ao medio ambiente e a sostibilidade. Así, expóñense diferentes propostas para detectar, previr e recuperar o solo queimado tras un incendio forestal: uns rapaces amosan como aproveitar as cinzas para fabricar ladrillos; outros desenvolveron unha espuma de orixe vexetal con alto poder ignífugo, capaz de cubrir a vexetación e axudar a frear a propagación do lume... Un equipo creou unha boia para controlar a calidade da auga en acuicultura, co fin de garantir a saúde dos organismos mariños. Un dos proxectos baséase na recuperación de auga residual en edificios para convertela en enerxía, outro propón a utilización de plantas para depurar auga contaminada, e un sistema de rega intelixente aforra o consumo de auga e optimiza o coidado das plantas.
A Tecnópole tamén salienta propostas “tan curiosas” como un esmalte de uñas vegano, elaborado con ingredientes naturais, que evita os riscos para a saúde que provocan os compostos químicos de moitas lacas comerciais. Un dos equipos estudou os restos de naufraxios na ría de Vigo. Outro investigou se a cor dos ollos afecta ao desenvolvemento de enfermidades visuais. E tamén hai proxectos de impacto social, como o uso da música para mellorar a memoria das persoas maiores; ou un sistema intelixente para regular a temperatura da calefacción, adaptado ás persoas maiores ou con necesidades especiais.
Ademais do concurso de proxectos, a feira compleméntase con actividades que buscan achegar a ciencia e a tecnoloxía aos máis novos de xeito práctico e divertido. O alumnado de Primaria e Educación Especial está a participar en dous obradoiros diferentes. Por un lado, están a coñecer diferentes trucos para elaborar contrasinais orixinais e o suficientemente seguros como para resistir posíbeis ciberataques. Por outro lado, a rapazada está a coñecer a realidade dos cibercebos, informacións falsas que buscan a nosa atención para lucrarse. Neste obradoiro os participantes están a recibir as claves para saber cando e onde debemos clicar, e cando non.
Este xoves 14 de maio, entre as 11 e as 12 horas, vaise celebrar un novo espectáculo de ciencia para alumnado de Secundaria, FP e Bacharelato. Poderá seguirse a través da canle de YouTube de Tecnópole. Ademais, celebrarase a final do desafío científico Atrévete coa ciberseguridade!, no que durante os últimos meses participaron de xeito en liña equipos de 4º de Primaria a Bacharelato de toda Galicia.

Julio Abalde entrega os diplomas de ciberexpert@s a máis dun cento de escolares da Coruña

S. P. — 2026-05-13T11:20:00Z

Esta mañá o subdelegado do Goberno na Coruña, Julio Abalde, inaugurou o Fórum Metropolitano da Coruña o acto de entrega de diplomas do programa Ciberexpert@s 2026, organizado pola Policía Nacional da cidade herculina e no que participaron arredor de 125 escolares de 6º de Primaria de varios centros da contorna. Encontro no que participaron arredor de 125 escolares de 6º de Primaria dos CEIP Raquel Camacho, Concepción Arenal e Sal Lence, que recibiron os seus diplomas como recoñecemento á formación desenvolvida durante varias xornadas sobre seguridade dixital, uso responsábel de internet e prevención dos riscos nas redes sociais.
Pola súa banda, Julio Abalde quixo pór en valor “o importante labor preventivo que desenvolve a Policía Nacional nos centros educativos da cidade para formar a nenos e nenas nun uso seguro e responsábel das novas tecnoloxías”. O subdelegado salientou ademais que “a educación dixital é clave para protexer á infancia fronte a ameazas como o ciberacoso, a suplantación de identidade ou as tecnoadicións”.
O programa Ciberexpert@s forma parte do Plan Director para a Convivencia e Mellora da Seguridade nos Centros Educativos e as súas Contornas, unha iniciativa impulsada polo Ministerio do Interior para previr situacións de risco que afecten á seguridade e ao benestar dos e das menores.
Ao longo das sesións formativas o alumnado aprende a identificar e minimizar os perigos asociados ao uso cotián das Tecnoloxías da Información e da Comunicación (TIC), analizando cuestións como o ciberacoso, o grooming, a seguridade nas redes sociais ou o uso responsábel de internet.
As actividades inclúen tamén accións dirixidas ás familias, ás que se lles facilitan ferramentas para acompañar ás e aos menores nunha navegación segura e nun uso axeitado das redes sociais. “A mellor ferramenta para previr os riscos dixitais é a formación e a concienciación desde idades temperás”, destacou o subdelegado.
Logo de superar un test final, os alumnos e alumnas participantes reciben o carné oficial de Ciberexpert@s, impreso pola Fábrica Nacional de Moeda e Timbre.
Para rematar o acto levouse a cabo unha presentación multimedia de repaso dos contidos traballados durante o programa e unha actuación musical do artista infantil Chuches Amil, antes da entrega final dos diplomas.

Ábrense as reservas do Sony Xperia 1 VIII a prezos absurdamente elevados

Redacción — 2026-05-13T10:50:32Z

Sony anunciou o novo smartphone Xperia 1 VIII, un terminal de gama alta que aposta pola integración de Xperia Intelligence para mellorar automaticamente a experiencia fotográfica. O dispositivo incorpora un novo asistente de cámara con IA capaz de recomendar tons de cor, efectos bokeh e selección de obxectivos en función da escena ou do suxeito encadrado, coa intención de facilitar a creación de fotografías cun acabado máis creativo sen necesidade de coñecementos técnicos avanzados.
O sistema baséase na tecnoloxía Creative Look desenvolvida a partir da experiencia das cámaras Alpha, permitindo aplicar cun só toque distintos estilos de imaxe adaptados á situación. O asistente analiza factores como o tipo de escena, o obxecto fotografado ou mesmo as condicións meteorolóxicas para propoñer axustes personalizados.
A principal novidade do apartado fotográfico chega da man do teleobxectivo, que incorpora un sensor de 1/1,56 polgadas, unhas catro veces máis grande que o empregado no Xperia 1 VII. Esta mellora busca ofrecer fotografías máis detalladas e luminosas, especialmente en condicións de pouca luz. Sony asegura que as tres cámaras traseiras (16 mm, 24 mm e 70 mm) conseguen un rendemento comparable ao dunha cámara full-frame no relativo á redución de ruído e ao rango dinámico.
O procesado RAW multifotograma aplícase agora a todos os obxectivos, ampliando o HDR e reducindo o ruído nas escenas escuras. Tamén se mellora a conservación de detalle nas luces e nas sombras, así como a fidelidade cromática en situacións de alto contraste.
O Xperia 1 VIII introduce tamén un novo deseño denominado ORE, inspirado en materiais naturais e acompañado de catro acabados baseados en pedras preciosas en bruto: negro, prata, vermello e dourado. Sony indica que se aplicou un novo tratamento ás superficies laterais e traseiras para ofrecer unha textura máis agradable ao tacto e unha mellor adherencia.
Mantense o botón físico dedicado para o obturador da cámara, pensado para reproducir unha experiencia máis próxima á dunha cámara tradicional. O terminal continúa integrando unha conexión de audio de 3,5 milímetros, orientada aos usuarios que prefiren auriculares con cable e reprodución de alta calidade herdada da experiencia da gama Walkman.
O apartado de son complétase con novos altofalantes Full-Stage Stereo, que empregan unidades idénticas nos lados esquerdo e dereito para reforzar a separación estéreo, mellorar os graves e ampliar a escena sonora.
No interior do dispositivo atópase a plataforma Snapdragon 8 Elite Gen 5 de Qualcomm, coa que se promete un incremento do rendemento do 20 %. Sony destaca melloras na velocidade de execución das aplicacións, multitarefa, xogos e creación de contidos. A optimización enerxética tamén se estende ás aplicacións de navegación e mapas para reducir o consumo eléctrico.
A batería promete unha autonomía de ata dous días e unha vida útil de ata catro anos mantendo un bo estado de funcionamento.
O Xperia 1 VIII está dispoñible en reserva, tendo o modelo con 256 GB un prezo de 1.499 euros, e durante a campaña de reserva inclúe os auriculares WH-1000XM6. A versión ouro nativo con 1 TB de almacenamento venderase exclusivamente na tenda en liña de Sony por 1.999 euros. Este esquema de prezos xunto co feito de que Sony tería externalizado a fabricación dos seus móbiles deixa claro que a compañía nipoa non ten a intención de recuperar a súa posición de mercado, polo que manterá a súa irrelevancia comercial.

Vídeo de presentación do Sony Xperia 1 VIII

Os Premios PEL da Deputación da Coruña baten récord de participación con 145 candidaturas presentadas

S. P. — 2026-05-13T10:30:00Z

A oitava edición dos Premios PEL, os galardóns da Deputación da Coruña ás mellores e máis innovadoras iniciativas empresariais da provincia, bate este ano récord de participación con 145 candidaturas presentadas.
O prazo de presentación rematou de feito este 12 de maio “cunha cifra que confirma a consolidación destes premios como un referente no recoñecemento ao talento emprendedor, á capacidade innovadora e á contribución das pequenas e medianas empresas, microempresas e profesionais autónomos/as ao desenvolvemento económico e social da provincia”, en palabras da Deputación, que reforzou nesta convocatoria o seu apoio ao tecido empresarial máis próximo á cidadanía, cunha dotación total de 80.000 euros destinada a recoñecer proxectos empresariais que destacan “pola súa traxectoria, pola súa aposta pola sostibilidade, pola súa implantación no territorio e polo seu carácter singular”.
As candidaturas presentadas concorren ás catro categorías principais dos premios. Un total de 28 novas empresas optan ao galardón á mellor iniciativa emprendedora; 38 candidaturas aspiran ao recoñecemento á mellor traxectoria empresarial; 26 proxectos preséntanse á nova categoría de territorio sostible e 40 iniciativas concorren ao premio destinado a recoñecer as propostas empresariais máis singulares.
Ademais, os membros do xurado rexistraron 13 candidaturas na categoría honorífica, que este ano estará dedicada ás iniciativas transformadoras do rural. Esta mención terá carácter honorífico e non levará asociada dotación económica.
Cada unha das catro categorías principais contará, con carácter xeral, cun premio de 20.000 euros. As bases contemplan tamén a posibilidade de conceder accésits cando a diferenza de puntuación entre as dúas mellores candidaturas sexa mínima. Nese caso, o primeiro premio pasaría a estar dotado con 15.000 euros e o accésit con 5.000 euros.
Gala de entrega no Coruña Estudio Inmersivo
Unha vez pechado o prazo de presentación de candidaturas, o xurado de expertos avaliará estas semanas os proxectos concorrentes e seleccionará as empresas, microempresas e profesionais autónomos/as gañadores desta oitava edición.
A gala de entrega dos Premios PEL 2026 celebrarase o mércores 19 de xuño no Coruña Estudio Inmersivo (CEI), situado na Cidade das TIC da Coruña. O acto desenvolverase en horario de tarde e reunirá representantes do tecido empresarial, social e institucional da provincia.

Este sábado celébrase en Lugo a gala dos primeiros Premios Dalle Like

S. P. — 2026-05-13T10:16:24Z

A primeira edición dos Premios Dalle Like Galinfluencers celebrarase o 16 de maio de 2026 no Círculo das Artes de Lugo, entre as 20.00 e as 23.00 horas. Esta gala está dirixida a “reivindicar o talento galego nas redes sociais” e terá un formato e unha temática de romaría tradicional, con actuacións de Lucía Pérez e contando cunha festa posterior no Versus XL con DJ Kike Varela. Intervirán artistas internacionais e haberá postos gastronómicos.
O obxectivo do certame, que inclúe votacións abertas na Rede a través da web de seu, é “recoñecer a creadores de contido, proxectos e marcas galegas”.
A gala será un evento benéfico, no que se recadarán fondos para a Protectora de Animais de Lugo.
O certame ten o apoio de institucións como a Deputación de Lugo, que achega 3.000 euros para o seu desenvolvemento e o seu impulso.
O certame tamén conta co apoio da Secretaría Xeral da Lingua que dirixe Valentín García, e máis da Consellería de Medio Rural.
Como dixemos, os Premios Dalle Like, que veñen con 10 categorías, buscan recoñecer o talento galego no ámbito dixital e das redes sociais.

As probas de certificación ComDix no seu nivel Intermedio rexistraron unha elevada participación

S. P. — 2026-05-13T10:10:00Z

As Aulas CeMIT da Rede CeMIT, espazos de referencia para a formación e capacitación dixital da cidadanía galega, dependentes da axencia autonómica AMTEGA, acolleron entre o 28 e o 30 de abril unha nova convocatoria das probas de acceso libre para a obtención da certificación ComDix Intermedio.
Segundo destacan dende AMTEGA, esta convocatoria destacou pola súa "elevada participación”, con 993 persoas presentadas nas diferentes localidades que forman parte da rede. Ademais, salienta a axencia, “a diversidade xeográfica das sedes permitiu que cidadáns e cidadás de toda Galicia puidesen acceder ás probas en condicións de proximidade e comodidade, reforzando así o compromiso da Rede CeMIT coa inclusión dixital e a igualdade de oportunidades”.
A maiores, os resultados provisionais, publicados recentemente, reflicten “un notábel nivel de preparación por parte das persoas participantes”. De feito, máis de 600 aspirantes acadaron a cualificación de apto, o que supón unha porcentaxe de éxito moi significativa nesta edición. “Este dato pon de manifesto o interese crecente da sociedade galega por mellorar as súas competencias dixitais e acceder a certificacións oficiais que reforcen o seu perfil profesional e persoal”, salientou AMTEGA, que transmitiu un agradecemento a todas as persoas participantes, así como ao persoal técnico das aulas pola súa implicación na organización e desenvolvemento das probas.
Os resultados definitivos faranse públicos unha vez completado o proceso de revisión e validación.
Nivel Iniciación
AMTEGA tamén fixo saber estes días que está aberto o período de inscrición para que 1.259 persoas poidan obter a Certificación Ga lega en C ompetencias D ixitais (ComDix), no seu nivel Iniciación. As probas faranse en 46 localidades con aula CeMIT.
Esta convocatoria está aberta a toda a cidadanía e ten como finalidade acreditar os coñecementos, habilidades e actitudes necesarias para utilizar as tecnoloxías dixitais, tanto a nivel persoal como social ou profesional.
As probas realizaranse os días 17, 18 e 19 de xuño repartidas en 98 quendas que abarcan diferentes horarios de mañá (ás 10 e ás 12 horas) e de tarde (16:30 horas) para poder así facilitar a asistencia das persoas interesadas.
Segundo lembra a AMTEGA, os lugares e datas concretas cos seus horarios pódense consultar na páxina web da rede CeMIT, na que figura o calendario destas probas presenciais nas devanditas 46 Aulas CeMIT así como información sobre toda a tramitación e inscrición neste proceso.
Na plataforma de teleformación da Rede CeMIT pódense atopar en liña os contidos formativos para a preparación da proba, que abarcan as 5 áreas e as 21 competencias definidas no Marco Galego de Competencias Dixitais.
Para obter o certificado ComDix Iniciación é preciso superar na proba un cuestionario de entre 60 e 70 preguntas tipo test que inclúe a avaliación das 21 competencias que establece o Marco Galego ComDix.
Novas convocatorias neste ano 2026
AMTEGA lembra tamén que durante o segundo semestre esta previsto publicar no Diario Oficial de Galicia novas convocatorias destas probas presenciais para obter a certificación de competencias dixitais (ComDix).
A previsión é convocar o ComDix no seu nivel Intermedio a mediados do mes de outubro e, no seu nivel Iniciación, a primeira semana de decembro. As datas exactas, xunto coas bases da convocatorias, está previsto publicalas a primeiros do mes de setembro.

Vigo converterase en xullo en capital das tecnoloxías fotónicas co evento The Pulse Hackathon

S. P. — 2026-05-13T09:55:13Z

Vigo converterase entre o 8 e o 10 de xullo no epicentro da innovación en tecnoloxías fotónicas coa celebración de The Pulse Hackathon. Durante 28 horas ininterrompidas, estudantes de todo o país enfrontaranse en equipos a un desafío sobre comunicacións ópticas no ámbito submarino.
Este evento nace da Cátedra Deeptech entre Monodon by Navantia e QoPhi, o laboratorio do Centro de Investigación atlanTTic da Universidade de Vigo (UVigo) dedicado á investigación e divulgación de fotónica.
Segundo lembran dende as entidades organizadoras, a fotónica é a disciplina que utiliza fotóns (luz) en lugar de electróns para transmitir información. As comunicacións fotónicas permiten enviar grandes cantidades de datos a maior velocidade con mínima interferencia e de forma máis cibersegura. “O seu estudo e desenvolvemento será clave para o sector das telecomunicacións e o desenvolvemento dos compoñentes electrónicos do futuro”, engade o centro atlanTTic da UVigo.
A participación está deseñada para alumnos de últimos cursos de grao, mestrado ou doutorado que conten con sólidos coñecementos técnicos na materia. O hackathon contará cunha selección exclusiva de entre 6 e 8 equipos, compostos por 4 o 5 persoas cada un, garantindo unha contorna de traballo colaborativa e de alto nivel.
Ademais da experiencia de traballar con mentores líderes no sector e enfrontarse a tecnoloxías de última xeración, o equipo que logre a solución máis eficiente e creativa recibirá un premio de 500 euros por persoa.
A maiores, outorgaranse outros premios para destacar as contribucións excepcionais dos participantes.
As inscricións no evento cómpre formalizalas na web do PULSE Hackathon.